इटहरी, चैत १३ – सुनसरीको इटहरीस्थित सेन्टर प्लाजामा आज बिहान ९:३० बजेदेखि लागेको भीषण आगलागी नियन्त्रण प्रयास जारी छ। उक्त घटनामा फसेका पाँच जनालाई सकुशल उद्धार गरिएको छ।
सशस्त्र प्रहरी बलका सहप्रवक्ता डीएसपी शैलेन्द्र थापाका अनुसार आगलागीको समयमा भवनभित्र रहेका पाँच जनालाई सकुशल बाहिर निकालिएको छ। उद्धारकार्यमा सशस्त्र प्रहरी, नेपाल प्रहरी, नेपाली सेना तथा स्थानीयबासी खटिएका छन्।
आगो नियन्त्रणका लागि सशस्त्र प्रहरी बलको नं. १ बराह बाहिनीका एसएसपी मनिष थापाको कमान्डमा १०५ सुरक्षाकर्मी परिचालित छन्। साथै, नेपाली सेना, नेपाल प्रहरी र स्थानीय दमकलहरू समेत घटनास्थलमा सक्रिय छन्। आगलागी थप फैलिन नदिन ६ वटा दमकल परिचालन गरिएको छ।
घटनास्थलमा अझै केही व्यक्ति फसेको आशंकामा नेपाली सेनाको हेलिकप्टरसमेत पठाइएको गृहमन्त्री रमेश लेखकको सचिवालयले जनाएको छ। आगलागीको कारणबारे अनुसन्धान भइरहेको छ भने क्षतिको विस्तृत विवरण आउन बाँकी छ।
- Jigyasa media
