मोरङ । मोरङको बूढीगंगा गाउँपालिका–५ नयाँ टोलमा बुधबार करेन्ट लागेर भारतीय वृद्ध दम्पतीको मृत्यु भएको छ। बिहान ११:५० बजे घटना भएको थियो। ७५ वर्षीय कैलाश मण्डल र उनकी पत्नी ७२ वर्षीया कुमादेवी मण्डलको घटनास्थलमै मृत्यु भएको मोरङ प्रहरीले पुष्टि गरेको छ।
प्रहरीका अनुसार मोटर चलाएर कल पेल्ने क्रममा विद्युत् प्रवाह भइ करेन्ट लाग्दा उनीहरूको ज्यान गएको हो। वृद्ध दम्पती भारत भागलपुरका भए पनि उनीहरू बूढीगंगा–५ स्थित देवनारायण चौधरीको फुसको छानो भएको घरमा भाडामा बस्दै आएका थिए र खेतीपाती गरिरहेका थिए।
इलाका प्रहरी कार्यालय नेमुवाबाट खटिएको सई प्रवीण खड्काको नेतृत्वमा प्रहरी टोलीले घटनास्थललाई सुरक्षित राखेको छ। शवलाई कानुनी प्रक्रिया पूरा गरेर पोस्टमार्टमका लागि हेटौंडा अस्पताल पठाउने तयारी भइरहेको मोरङ प्रहरीका डीएसपी ज्ञानेन्द्रबहादुर बस्नेतले जानकारी दिएका छन्।
घटनाको थप अनुसन्धान भइरहेको छ।
- Jigyasa media
