सोलुखुम्बु – लिखुपिके गाउँपालिका–३, काफ्लेचौरस्थित गाउँपालिका कार्यालयमा आइतबार दिउँसो आगलागी भएको छ।
जिल्ला प्रहरी कार्यालय सोलुखुम्बुका अनुसार बिजुलीको तार सर्ट हुँदा लागेको आगोले दुईतले भवन जलेर नष्ट भएको छ। सो भवनमा गाउँपालिकाको प्राविधिक शाखा, स्टोर र प्रधानमन्त्री रोजगार कार्यक्रमको शाखा सञ्चालनमा रहेको थियो।
आगलागीपछि स्थानीयवासी र प्रहरी टोलीको सक्रियतामा नियन्त्रणमा लिइएको थियो। तर, आगोले सरकारी दस्तावेज जलेर नष्ट भएको छ।
घटनास्थलमा प्रहरी निरीक्षकको नेतृत्वमा टोली परिचालन गरिएको थियो। आगलागीका क्रममा ग्यास सिलिन्डर विस्फोट हुँदा आगो थप फैलिएको प्रहरी नायब उपरीक्षक द्वारिकाप्रसाद घिमिरेले जानकारी दिए।
प्रमुख जिल्ला अधिकारी अनोजकुमार घिमिरेका अनुसार घटनामा कुनै मानवीय क्षति नभए पनि महत्वपूर्ण सरकारी कागजात जलेका छन्। आगलागीबाट भएको क्षतिको विस्तृत विवरण संकलन गर्ने कार्य भइरहेको छ।
- Jigyasa media
