काभ्रेपलाञ्चोक। काभ्रेपलाञ्चोकको पाँचखाल नगरपालिका–१२, सेरा गाउँमा धान रोप्ने क्रममा करेन्ट लाग्दा एक जनाको मृत्यु भएको छ भने एक महिला घाइते भएकी छन्।
प्रहरीका अनुसार शनिबार दिउँसो करिब २ बजे आफ्नै खेतमा धान रोप्ने क्रममा ६१ वर्षीय कान्छा दनुवारलाई पानी तान्ने मोटर (मेसिन)को नांगो विद्युत् तार पानीमा डुबेको अवस्थामा करेन्ट लागेको थियो।
गम्भीर घाइते भएका दनुवारलाई तत्काल उपचारका लागि धुलिखेल अस्पताल पुर्याइएको थियो। अस्पतालमा उपचारकै क्रममा बेलुका ४:३० बजे चिकित्सकले मृत घोषणा गरेका हुन्।
उक्त घटनामा सोही स्थानकी २६ वर्षीया अनु दनुवार पनि करेन्ट लागेर घाइते भएकी छन्। उनको दाहिने हातको बुढी औँलामा चोट लागेको छ भने स्वास्थ्य अवस्था सामान्य रहेको र धुलिखेल अस्पतालमा उपचार भइरहेको प्रहरीले जनाएको छ।
घटनाबारे जानकारी प्राप्त हुनासाथ जिल्ला प्रहरी कार्यालय काभ्रेपलाञ्चोकबाट प्रहरी निरीक्षकको नेतृत्वमा SOCO (घटनास्थल अनुसन्धान) टोली खटिई घटनास्थलको मुचुल्का तयार पार्नुका साथै आवश्यक अनुसन्धान अघि बढाइएको प्रहरीले जनाएको छ।
-
Jigyasanepal
