काठमाण्डौ । काठमाडौँ उपत्यकामा हिउँद सुरु हुनासाथ चिसो एकाएक तीव्र भएको छ। मंसिर २०, शनिबार बिहान काठमाडौँ उपत्यकाको न्यूनतम तापक्रम ६.२ डिग्री सेल्सियसमा झरेको मौसम पूर्वानुमान महाशाखाले जनाएको छ।
हिजो शुक्रबार सोही समयमा तापक्रम ९.० डिग्री सेल्सियस थियो। यस आधारमा २४ घण्टाभित्रै करिब ३ डिग्री सेल्सियसको भारी गिरावट आएको हो।
मौसमविद् रोजन लामिछानेका अनुसार शनिबार बिहान ५:४५ को मापनमा प्राप्त तापक्रम हालसम्मकै उल्लेखनीय गिरावट हो। उनले भने, “आधिकारिक न्यूनतम तापक्रम ८:४५ बजे जारी हुनेछ, त्यतिबेलासम्म अझै घट्ने सम्भावना छ।”
शुक्रबार बिहान ८:४५ बजे उपत्यकाको तापक्रम झरेर ८.६ डिग्री सेल्सियस कायम भएको थियो। लगातार घटिरहेको तापक्रमका कारण काठमाडौँवासीले विगत केही दिनको तुलनामा बढी चिसो अनुभूत गरिरहेका छन्।
हावा चिसिँदै, सडकमै हुस्सु
शनिबार बिहान उपत्यकाका अधिकांश स्थानमा हुस्सु छाएको देखिएको छ। तापक्रम झर्दै गएपछि विहानै कार्यालय, विद्यालय जाने सर्वसाधारणलाई आवागमनमा कठिनाइ भएको छ।
मौसमविद्हरूका अनुसार पश्चिमी वायुको प्रभाव र रातको आकाश खुला भएकाले तापक्रममा तीव्र गिरावट आएको हो।
आगामी दिनमा तापक्रम अझै घट्ने सम्भावना रहेकाले महाशाखाले जनस्वास्थ्य र यात्रामा विशेष सतर्कता अपनाउन आग्रह गरेको छ।
-
Jigyasanepal
