काठमाडौं, साउन ८, २०८२ ।

देशभर सक्रिय रहेको मनसुनी प्रणाली केही कमजोर देखिए पनि आज बिहीबार (साउन ८) नेपालका विभिन्न स्थानमा वर्षाको क्रम जारी रहनेछ। जल तथा मौसम पूर्वानुमान महाशाखाको बुलेटिनअनुसार, आज दिनभरि आंशिकदेखि सामान्य बदलीको अवस्था रहनेछ भने कोसी, बागमती, गण्डकी, कर्णाली र सुदूरपश्चिम प्रदेशका पहाडी भूभागमा वर्षाको सम्भावना बढी देखिएको छ।

🔹 दिनमा — मध्यम वर्षाको आशंका

आज दिनको समयमा कोसी, बागमती, गण्डकी, कर्णाली र सुदूरपश्चिमका पहाडी भेगहरूमा मेघगर्जन र चट्याङसहित हल्कादेखि मध्यम वर्षा हुन सक्ने महाशाखाले जनाएको छ। बाँकी प्रदेशहरूमा भने थोरै स्थानमा वर्षा हुन सक्छ।

🔹 रातमा — भारी वर्षाको उच्च सम्भावना

आज राति कोसी, मधेस र बागमती प्रदेशका केही स्थानमा पनि मेघगर्जन/चट्याङसहित हल्कादेखि मध्यम वर्षा, र कोसी तथा मधेस प्रदेशका पहाडी तथा तराई क्षेत्रहरूमा भारी वर्षा को सम्भावना रहेको छ।

🌧 कति पानी परे ‘के’ भन्ने? – वैज्ञानिक मापदण्ड यस्ता छन्

१० मिमि भन्दा कम वर्षा = हल्का वर्षा

१०–५० मिमि = मध्यम वर्षा

५०–१०० मिमि = भारी वर्षा

१००–२०० मिमि = धेरै भारी वर्षा

२०० मिमि भन्दा बढी = अति भारी वर्षा

🗺 ‘कतै–कतै’ भन्नुको अर्थ के हो? – प्राविधिक आधार यस्तो छ

एक–दुई स्थान = १०% भन्दा कम क्षेत्र

थोरै स्थान = १०%–३०% क्षेत्र

केही स्थान = ३०%–५०% क्षेत्र

धेरै स्थान = ५०%–८०% क्षेत्र

अधिकांश स्थान = ८०% भन्दा बढी क्षेत्र

सावधानी अपनाऔं!

कोसी र मधेसका तराई क्षेत्रहरूमा भारी वर्षाको सम्भावना भएकाले नदी–नाला आसपासका बासिन्दा, यात्रु र कृषकहरूलाई विशेष सतर्कता अपनाउन आग्रह गरिएको छ।

यद्यपि मनसुन कमजोर अवस्थामा देखिएको छ, तर पहाडी र तराई भेगमा भारी वर्षाको जोखिम कायमै छ। चट्याङ र बाढी–पहिरोको जोखिम रहेका क्षेत्रका नागरिकहरूले आवश्यक सुरक्षात्मक उपाय अपनाउन मौसमविद्हरूको सुझाव छ।

• Jigyasanepal