काठमाडौं, भदौ १७ ।
सुडानको पश्चिमी मारा पहाड क्षेत्रमा गएको विनाशकारी पहिरोले पूरा गाउँ नै बगाएको छ। सुडान मुक्ति आन्दोलन/सेनाका अनुसार, कम्तीमा १,००० जनाको मृत्यु भएको छ भने एक जना मात्र जीवित बच्न सफल भएका छन्।
बीबीसीका अनुसार, यो घटना अगस्ट ३१ मा दुर्गम तारासिन गाउँमा भयो। निरन्तर परेको मुसलधारे वर्षापछि आएको पहिरोले गाउँको ठूलो भूभाग क्षतिग्रस्त बनाएको हो।
मानवीय संकट र अपिल
सुडान मुक्ति आन्दोलन/सेनाले संयुक्त राष्ट्र संघसहित अन्तर्राष्ट्रिय र क्षेत्रीय संस्थालाई तात्कालिक मानवीय सहयोगका लागि अपिल गरेको छ।
पहिरो गएको इलाका हाल सोही संगठनको नियन्त्रणमा छ, जहाँ उनीहरू सुडान सेनासँगै अर्धसैनिक समूह र्यापिड सपोर्ट फोर्स (RSF) विरुद्ध लडिरहेका छन्।
युद्ध र पहिरोबीच दोहोरो विपत्ति
अप्रिल २०२३ देखि सुरु भएको सुडानको गृहयुद्धले देशलाई अराजकता र अनिकालको गर्तमा पुर्याइसकेको छ।
संयुक्त राष्ट्रका तथ्यांक अनुसार हालसम्म ८ लाखभन्दा बढी शरणार्थी डार्फर क्षेत्रमा विस्थापित भएका छन्।
एक अमेरिकी अधिकारीका अनुसार, गत वर्षदेखि मात्रै करिब १.५ लाख मानिसको मृत्यु भएको छ।
करिब १ करोड २० लाख सुडानी आफ्नै घर छाड्न बाध्य भएका छन्।
पहिरो प्रभावित मारा पर्वत क्षेत्रमा पनि ठूलो संख्यामा युद्धपीडित विस्थापितहरू आश्रय लिइरहेका थिए। यही कारण मृतकको संख्या उच्च भएको अनुमान गरिएको छ।
-
Jigyasanepal
