बागलुङ । बागलुङ ताराखोला गाउँपालिका–५ मराममा सोमबार बिहान एक दर्दनाक दुर्घटना घटेको छ। स्थानीय स्तरमा घर निर्माणका लागि ढुङ्गा निकाल्ने क्रममा माथिबाट अचानक खसेको ढुङ्गाले लागेर स्काभेटरका सहचालकको मृत्यु भएको हो।

जिल्ला प्रहरी कार्यालय बागलुङका अनुसार ज्यान जानेमा रोल्पा घर भई हाल मजदुरीका लागि बागलुङ आएका १९ वर्षीय विशाल पुन मगर रहेका छन्। मरामगाउँमा स्थानीय बलबहादुर रोका मगरको निजी घर निर्माणका लागि स्काभेटर प्रयोग गरी ढुङ्गा निकालिँदै गर्दा माथिबाट ठूलो ढुङ्गा खस्दै पुन मगरलाई ठोक्किएको र घटनास्थलमै मृत्यु भएको पुष्टि गरिएको छ।

दुर्घटना भएपछि प्रहरी निरीक्षक कमलजङ्ग थापा नेतृत्वको टोली घटनास्थल पुगेको थियो। प्रहरीले मुचुल्का दर्ता गरी शवलाई पोस्टमार्टमका लागि गलकोट नगर अस्पताल, हरिचौर लगेको जनाएको छ।

स्थानीयहरूका अनुसार पहाडी भू–भागमा भइरहेको निर्माणाधीन काममा पर्याप्त सुरक्षा उपाय नअपनाउँदा यस्ता दुर्घटना दोहोरिन थालेका छन्। मृतक पुन मगरको परिवार आर्थिक रूपमा कमजोर भएको र उनी केही महिनादेखि रोजगारीका लागि बागलुङमा मजदुरी गर्दै आएको बताइएको छ।

प्रहरीले घटनाबारे थप अनुसन्धान अघि बढाएको छ।

• Jigyasanepal