काठमाडौं, भदौ १ – नेपालमा सक्रिय मनसुन प्रणाली अझै पूर्ण बलियो नभए पनि वर्षाको असर विभिन्न प्रदेशमा देखिएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार अहिले मनसुनको न्यूनचापीय रेखा सरदर स्थानभन्दा दक्षिणतर्फ अवस्थित छ। यससँगै बंगालको खाडीबाट लगातार जलवाष्पयुक्त हावा भित्रिँदै रहेकाले आज देशभर बदली र वर्षाको सम्भावना बढेको छ।

दिउँसोको स्थिति

आज दिउँसो देशभर साधारणतया बदली रहनेछ। मधेस, कोशी र बागमती प्रदेशका तराई तथा पहाडी भूभागमा वर्षा तीव्र हुने अनुमान गरिएको छ। त्यस्तै, गण्डकी, लुम्बिनी, कर्णाली र सुदूरपश्चिम प्रदेशका पहाडी भूभागमा पनि वर्षा हुने सम्भावना छ।

कोशी र बागमती प्रदेशका पहाडी भागका केही स्थानमा भारी वर्षा हुन सक्ने मौसम पूर्वानुमान महाशाखाले चेतावनी दिएको छ।

बाँकी तराईका कतिपय भूभागमा पनि मध्यम वर्षा पर्न सक्ने अनुमान गरिएको छ।

रातिको स्थिति

आज राति देशका धेरैजसो भागमा आंशिकदेखि साधारणतया बदली रहनेछ।

मधेस, कोशी र सुदूरपश्चिम प्रदेशका साथै अन्य प्रदेशका पहाडी भूभागमा वर्षा तीव्र हुने सम्भावना छ।

विशेषगरी कोशी प्रदेशका तराई र पहाडी भागमा भारी वर्षाको उच्च सम्भावना भएकाले सतर्कता अपनाउन विभागले सुझाव दिएको छ।

सतर्कता अपनाउन आग्रह

विभागले विशेषगरी पहाडी भूभागमा हुने सम्भावित भूस्खलन, पहिरो, बाढी र खोला–नालामा पानीको सतह बढ्ने खतरा रहँदै आएको चेतावनी दिएको छ। साथै, तराईका कतिपय भागमा जलजमाव हुन सक्ने भएकाले सावधानी अपनाउन अनुरोध गरिएको छ। भारी वर्षाको सम्भावना रहेका क्षेत्रमा यात्रा गर्दा सतर्कता अपनाउन, नदी–नालाको सतह नाघ्दा आवश्यक पूर्वतयारी गर्न र सम्भावित विपद् व्यवस्थापनमा स्थानीय निकाय र सुरक्षाकर्मीलाई सचेत रहन महाशाखाले आग्रह गरेको छ।

• Jigyasanepal