गोरखा।
गोरखाको चुमनुव्री गाउँपालिका–६, ताजुमा भीषण आगलागी हुँदा तीनवटा घर पूर्णरूपमा नष्ट भएका छन्। बिहीबार दिउँसो करिब साढे चार बजे खाना पकाउने चुल्होबाट सुरु भएको आगो तीव्र रुपमा फैलिँदा जस्ताले छाएका दुई कच्ची घर र भूकम्पपछि निर्माण गरिएको एउटा घर नष्ट भएको स्थानीय प्रहरी निरीक्षक ध्रुवप्रसाद शर्माले जानकारी दिए।
घरभित्र रहेका लत्ताकपडा, अन्नपात, भाँडाकुडा लगायत सम्पूर्ण सामग्री आगोले नष्ट गरेको छ। यस्तै, घरको भुइँ तलामा रहेका आठ गाई र तीन गोरु समेत आगोमा परेर जलेको प्रहरी निरीक्षक शर्माले बताए।
घटनाको जानकारी पाउनेबित्तिकै चुम्चेत प्रहरी चौकीबाट टोली घटनास्थलमा पुगेर स्थानीयको सहयोगमा आगो नियन्त्रणमा लिएको थियो। यद्यपि, ठूलो आर्थिक क्षति भए पनि मानवीय क्षति भने नभएको जनाइएको छ।
स्थानीय बासिन्दाका अनुसार समयमै हिमपात नभएको र हावाहुरीका कारण आगो थप फैलिएको थियो। आगलागीको असरले नजिकै रहेको मङ्गङ गुम्बाको जस्ता र माने दुङ्गुरसमेत उडाएको स्थानीय गोपाल गुरुङले जानकारी दिए। उनले हावाहुरीले उडाएको धुलोका कारण स्थानीयवासीमा रुघाखोकी लगायतका समस्या देखा परेको बताए।
घटनाबारे थप अनुसन्धान भइरहेको प्रहरीले जनाएको छ।
- Jigyasa media
