रसुवा, असार २५ – चीनको तर्फबाट आएको भीषण बाढीले नेपाल–चीन सिमानाक्षेत्रमा विनाश मच्चाउँदा कम्तीमा ९ जनाको मृत्यु भइसकेको छ भने १९ जना अझै बेपत्ता रहेका छन्।

बाढीमा परेका प्रहरी सहायक निरीक्षक लालबहादुर श्रेष्ठको शव चितवनको १५ किलोस्थित त्रिशूली नदी किनारमा फेला परेपछि मृतक संख्या ९ पुगेको हो। शव भेटिएको स्थानले बाढीको विनाशकारी प्रवाह कति टाढासम्म फैलिएको छ भन्ने देखाउँछ।

❗ बेपत्तामध्ये ६ जना चिनियाँ नागरिक

प्रहरी नायब महानिरीक्षक तथा प्रवक्ता विनोद घिमिरेका अनुसार अझै १९ जना बेपत्ताको खोजी जारी छ। तीमध्ये २ जना नेपाल प्रहरी, ६ जना चिनियाँ नागरिक, र ११ जना सर्वसाधारण रहेको पुष्टि भएको छ।

👮‍♂️ ३८३ प्रहरी खटिए उद्धारमा

बाढीबाट प्रभावित व्यक्तिहरूमध्ये हालसम्म ५७ जनाको उद्धार गरिएको छ। उद्धार तथा खोजी कार्यका लागि ३८३ जना सुरक्षाकर्मीहरू निरन्तर खटिएका छन्। सुरक्षाकर्मीहरू जोखिम मोलेर नदी किनार र पहिरो क्षेत्रमै खोजी कार्यमा खटिएका छन्।

🇳🇵🇨🇳 मितेरी पुल र हाइड्रो ड्याममा ठुलो क्षति

प्राकृतिक विपत्तिको यो कहालीलाग्दो घटनाले नेपाल–चीन मैत्रीको प्रतीक मितेरी पुल नै बगाएको छ। साथै, बाढीले रसुवागढी हाइड्रोपावरको ड्याम र रसुवाको भन्सार यार्डमा समेत भारी क्षति पुर्‍याएको छ।

• Jigyasanepal