जिज्ञाशा नेपाल संवाददाता – धरान

धरान, सुनसरी । पारिवारिक जग्गा विवादले एक बाबु छोराबीचको सम्बन्धलाई यति विकराल बनायो कि, बुबाकै छातीमा छोराले छुरा रोप्दा ज्यानै गयो।

सुनसरीको देवानगञ्ज गाउँपालिका–२ का ६० वर्षीय सचिव अंसारीको आफ्नै छोरा मोहम्मद रियाज अंसारीको छुरा प्रहारबाट बुधबार मृत्यु भएको छ।

प्रहरीका अनुसार बिहान घरमै सामान्य विवादबाट सुरु भएको बहस झगडामा परिणत हुँदा छोराले बुबाको छाती र ढाडमा छुरा प्रहार गरेका थिए। छुरा लागेर गम्भीर घाइते भएका अंसारीलाई तत्कालै विराटनगरस्थित गोल्डेन अस्पताल लगिएको थियो।

तर दुर्भाग्यवश, उपचारको क्रममा उनको मृत्यु भएको सुनसरी जिल्ला प्रहरी कार्यालयका प्रहरी उपरीक्षक सुमनकुमार तिमल्सिनाले जानकारी दिए ।

छोरा नियन्त्रणमा, घटनाको थप अनुसन्धान जारी

प्रहरीले छुरा प्रहार गरेका मोहम्मद रियाज अंसारीलाई तत्कालै नियन्त्रणमा लिएको र घटनाबारे थप अनुसन्धान भइरहेको जनाएको छ।

“घरायसी विवादले एक जीवन लियो, त्यो पनि आफ्नै बाबुको,” एसपी तिमल्सिनाले भने, “यस्ता घटना समाजमा भावनात्मक सन्तुलन गुम्दा कस्तो भयावह स्थिति आउन सक्छ भन्ने उदाहरण हो।”

समाजले सोच्नैपर्ने प्रश्न :

परिवारभित्रको द्वन्द्व किन यति हिंस्रक रूप लिँदैछ?

कसरी बाबु–छोराबीचको सम्बन्ध यति कठोर मोडमा पुग्यो?

के हामीले समयमै संवाद र समझदारीको सेतु बनाउन सकेका छौं?

• Jigyasanepal