कालीकोट – कालीकोटको खाँडाचक्र नगरपालिका–१० चौकीमा दुई समूहबीचको झडप हुँदा एक किशोरको ज्यान गएको छ भने अर्का एक जना घाइते भएका छन्।
बुधबार राति हस्तबहादुर मल्लको नयाँ घरको पूजा भइरहेको स्थानमा रमाइलो हेर्न आएका युवाबीच विवाद हुँदा तिलागुफा नगरपालिका–७ छाप्रेका १७ वर्षीय राजेश शाहीको मृत्यु भएको जिल्ला प्रहरी कार्यालयले जनाएको छ।
झडपका क्रममा १६ वर्षीय भूपेन्द्र शाही घाइते भएका छन्। प्रारम्भिक अनुसन्धान अनुसार, विवाद उग्र बन्दा खुकुरी प्रहार भएको बताइएको छ।
घटनापछि बिहीबार बिहान जिल्ला प्रहरी प्रमुख डीएसपी टेकबहादुर रावत नेतृत्वको टोली घटनास्थलमा पुगेको थियो। संलग्न रहेको आशंकामा पाँच जनालाई नियन्त्रणमा लिइएको प्रहरीले जनाएको छ। पक्राउ परेका सबै १८ वर्षमुनिका रहेका छन्।
मृतकको शव पोस्टमार्टमका लागि सदरमुकाम मान्म ल्याइएको छ। प्रहरीले घटनाको विस्तृत अनुसन्धान भइरहेको जनाएको छ।
- Jigyasa media
