चैत १६, २०८१ | काठमाडौं – काठमाडौंको तीनकुने क्षेत्रमा भएको हिंसात्मक प्रदर्शनमा संलग्नहरूमाथि ज्यान मुद्दामा अनुसन्धान अघि बढाइएको छ। पक्राउ परेका व्यक्तिहरूलाई म्याद थपका लागि आइतबार जिल्ला अदालत, काठमाडौंमा उपस्थित गराइने भएको छ।

गम्भीर अभियोगमा अनुसन्धान अघि बढ्दै

एक सहन्यायाधिवक्ताका अनुसार, योजनाबद्ध रूपमा भएको आगजनी तथा हिंसात्मक क्रियाकलापका कारण सुरक्षाकर्मीको ज्यान जोखिममा परेको र सार्वजनिक तथा निजी सम्पत्तिमा गम्भीर क्षति पुगेको हुँदा ज्यान मुद्दासहित संगठित अपराध अन्तर्गत अनुसन्धान अघि बढाइएको छ।

"व्यक्तिलाई ज्यूँदै जलाउने कार्यमा जुन अभियोग लाग्छ, त्यही आधारमा तीनकुने घटनाको अनुसन्धान गरिन्छ," एक उच्च सरकारी वकिलले भने, "यो योजनाबद्ध हिंसा हो। सुरक्षाकर्मीहरूमाथि ज्यानै लिने गरी गाडी हुइँक्याइएको छ।"

यसअघि प्रहरीले ५१ जनालाई नियन्त्रणमा लिएको थियो। तीनकुने अन्नपूर्ण कम्प्लेक्स, कोटेश्वर, विमानस्थल, बालकुमारी लगायतका क्षेत्रमा भएको आगजनी, तोडफोड र लुटपाटमा संलग्नहरूमाथि थप कारबाही अघि बढाइने बताइएको छ।

प्रहरी स्रोतका अनुसार, घटनामा संलग्न अन्य व्यक्तिहरूको पहिचान तथा खोजी कार्य जारी छ।

• Jigyasa media