नुवाकोट । नुवाकोटको म्यागङ गाउँपालिका-३ गोगनेमा ६५ वर्षीय वृद्ध चमार तामाङको ढुंगा प्रहार गरी हत्या गरिएको छ। प्रहरीले हत्या आरोपीलाई पक्राउ गरेको छ।
घटना शुक्रबार बेलुकी भएको हो, जब छिमेकीको किरिया (घेवा)बाट सँगै फर्कने क्रममा आपसी विवाद उत्पन्न भयो। विवादकै क्रममा विदुर नगरपालिका-७ कुबिण्डेका ६५ वर्षीय लालबहादुर तामाङले ढुंगाले प्रहार गर्दा चमार तामाङको घटनास्थलमै मृत्यु भएको जिल्ला प्रहरी कार्यालय नुवाकोटले जनाएको छ।
हत्या घटनाको सूचना पाउनेबित्तिकै प्रहरी चौकी देउराली नुवाकोट र जिल्ला प्रहरी कार्यालय नुवाकोटबाट छुट्टाछुट्टै टोली घटनास्थलमा पुगेर लालबहादुर तामाङलाई पक्राउ गरेको प्रहरी नायब उपरीक्षक (डीएसपी) तिलक भारतीले जानकारी दिए। अहिले लालबहादुर तामाङलाई प्रहरी हिरासतमा राखेर थप अनुसन्धान भइरहेको डीएसपी भारतीले बताए।
- Jigyasa media
