असोज ९, २०८२ बिहीबार — गोरखा
उत्तरी गोरखाको चुमनुब्री गाउँपालिका–१ सामा गाउँकी २२ वर्षीया छिरिङ डिकी लामाले ८,१६३ मिटर अग्लो मनास्लु सफलतापूर्वक आरोहण गर्दै नेपालकै कान्छी आरोही बन्ने इतिहास रचेकी छन्।
छिरिङले सोमबार बिहान ६ बजे बेसक्याम्पबाट प्रस्थान गरी मंगलबार बिहान १०:५० बजे मनास्लुको शिखरमा पाइला टेकिन्। उनले पायोनियर एड्भेञ्चर कम्पनी प्रालिमार्फत आरोहण पूरा गरेकी हुन्।
घरायसी कामबाट शिखरसम्म
गाउँघरमै सामान्य जीवन बिताउँदै आएकी छिरिङ डिकी लामाले घरायसी काम गर्ने साधारण किशोरी भएर पनि उच्च साहस र आत्मबलका साथ हिमाल चढाइमा सफलताको शिखर छुन सकेकी छन्।
अन्तर्राष्ट्रिय र राष्ट्रिय कीर्तिमान
यसअघि १९ वर्षीया एक विदेशी युवतीले मनास्लु आरोहण गरेकी थिइन्।
तर नेपालमै मनास्लु आरोहण गर्नेमध्ये छिरिङ डिकी हालसम्मकै कान्छी आरोही बनेकी हुन्।
उनकी आफन्त र सह–आरोही नाङ्सल छोदेनले छिरिङको यो उपलब्धि गाउँकै गर्व र युवापुस्ताका लागि प्रेरणादायी भएको बताइन्।
सामा गाउँको गौरव
छिरिङसँगै सामा गाउँका थप चार जना आरोहीले पनि मनास्लु आरोहण गरेका छन्। यसअघि यही गाउँकी डिकील्हामु, मिंकार छिरिङ र नाङ्सल छोदेनले समेत मनास्लुको शिखर चुमिसकेका छन्।
२२ वर्षकै उमेरमा कठिन हिमाल आरोहण पूरा गरेकी छिरिङ डिकी लामाको साहसिक कदमले साना गाउँघरका युवतीहरू पनि दृढ इच्छाशक्ति र आत्मविश्वासका साथ विश्वकै चुनौतीपूर्ण शिखर चढ्न सक्छन् भन्ने सन्देश दिएको छ।
-
Jigyasanepal
