भक्तपुर, पुष ३ - भक्तपुर नगरपालिकामा घरायसी विवादले एक परिवारलाई शोकमा डुबाएको छ। सहिद स्मृति खेल मैदान नजिक ३१ वर्षीय नरेन्द्र बहादुर शाहीको आफ्नै बुबा दीप बहादुर शाहीको चक्कु प्रहारबाट ज्यान गएको हो।
जिल्ला प्रहरी परिसर भक्तपुरका सूचना अधिकारी ढुण्डीराज न्यौपानेका अनुसार घरायसी झगडाको क्रममा तरकारी काट्ने चक्कु प्रहार गर्दा नरेन्द्र गम्भीर घाइते भएका थिए। उनलाई तत्काल भक्तपुर अस्पताल लगिएको भए पनि उपचारका क्रममा मृत्यु भएको प्रहरीले जनाएको छ।
घटनामा संलग्न दीप बहादुर शाहीलाई प्रहरीले नियन्त्रणमा लिई आवश्यक अनुसन्धान गरिरहेको छ।
मृतक नरेन्द्रको शव पोस्टमार्टमका लागि चाँगुनारायण नगरपालिका-२ स्थित काठमाडौँ मेडिकल कलेज पठाइएको छ।
शाही परिवार अछामको कमल नगर नगरपालिका-६ हात्तीबाच स्थायी निवासी हुन्, तर उनीहरू केही समयदेखि भक्तपुरमा बसोबास गर्दै आएका थिए।
- Jigyasa media
