काठमाडौँ - काठमाडौँ महानगरपालिकाले प्रतिबन्धित ३५ बोरा प्लास्टिकका माला विभिन्न पसलबाट बरामद गरेको छ। नगर प्रहरी प्रमुख राजुनाथ पाण्डेका अनुसार प्लास्टिकका माला र विदेशी फूलको प्रयोगमा कडाइ गर्दै महानगरले १४ कात्तिकदेखि अनुगमन तीव्र बनाएको छ।
अनुगमनका क्रममा कोटेश्वरमा ना ४ ख ३१६८ नम्बरको मालवाहक सवारीसाधनबाट पनि विदेशी फूलका माला बरामद गरिएका छन्।
स्थानीय किसानलाई प्रोत्साहन गर्न महानगरले ४६ स्थानमा स्वदेशी फूलको निःशुल्क बिक्री स्थान तोकेको छ। दीवाली, नेपाल संवत्, र छठ पर्वलाई ध्यानमा राख्दै १४-१७ कात्तिकसम्म मल, मार्ट, पार्क, पार्टी प्यालेस, र बिजनेस सेन्टरहरूमा किसानलाई निःशुल्क स्टल उपलब्ध गराइएको महानगरले जनाएको छ।
महानगरले यो पहल गत वर्षदेखि सुरू गर्दै किसानलाई स्वदेशी उत्पादनको सहज बजार व्यवस्थापन गरिरहेको छ।
- Jigyasa media
