जर्जिया— जर्जियाको गुदौरी स्की रिसोर्टमा ११ भारतीय नागरिक मृत फेला परेका छन्। घटनाबारे थप जानकारी सार्वजनिक गर्दै तिब्लिसीस्थित भारतीय दूतावासले मृत्युको कारण पत्ता लगाउन अनुसन्धान जारी रहेको जनाएको छ।
स्थानीय प्रहरीका अनुसार रिसोर्टको दोस्रो तलामा ११ भारतीयसहित एक जर्जियाली नागरिकको शव फेला परेको छ। प्रारम्भिक अनुसन्धानका आधारमा कार्बन मोनोअक्साइड ग्यासका कारण उनीहरुको मृत्यु भएको आशंका गरिएको छ।
समाचार संस्था एएफपीका अनुसार उनीहरु सुतेकै ठाउँमा मृत भेटिएका थिए र शवमा कुनै बाहिरी चोटपटकको संकेत देखिएको छैन।
अधिकारीहरुले बताएअनुसार शुक्रबार विद्युत आपूर्ति अवरुद्ध भएपछि तेलबाट सञ्चालन हुने जेनेरेटर प्रयोग गरिएको थियो, जसबाट विषाक्त ग्यास निस्किएको हुनसक्ने अनुमान गरिएको छ।
घटनाबारे विस्तृत अनुसन्धान भइरहेको छ भने थप विवरण आउन बाँकी रहेको अधिकारीहरुले जनाएका छन्।
- Jigyasa media
