दाङ, कात्तिक २७, २०८१

दाङको राजपुर गाउँपालिका–७ का वडाध्यक्ष पुस्कर वलीसहित ६ जनालाई वन मुद्दामा अनुसन्धानका लागि डिभिजन वन कार्यालय दाङ (देउखुरी)ले पक्राउ गरेको छ। दुई वर्षअघिदेखि वडाध्यक्षको मिलेमतोमा कानुनी प्रक्रिया बिना सामुदायिक वनका रुखहरू काटिएको उजुरी आएपछि उनीहरूमाथि अनुसन्धान सुरु गरिएको हो।

डिभिजन वन कार्यालयले अनुसन्धानका क्रममा राप्ती किनार सामुदायिक वनमा ७४ वटा विभिन्न प्रजातिका रुखहरू अवैध रूपमा काटिएको पुष्टि गरेको छ। उक्त रुखहरूमा साल, ढौंटी, खयर लगायतका प्रजातिहरू रहेका थिए, जसको काठको परिमाण लगभग ३०० क्युफिट रहेको वन अधिकृत छोटेलाल चौधरीले बताए। यो कार्य स्थानीय विद्युत विस्तार क्रममा भएको र रुखहरू मिलेमतोमा काटिएको आरोप छ।

अनुसन्धानका क्रममा वडाध्यक्ष वलीसहित घनबहादुर वली, उनका छोरा तिलक वली, पदमबहादुर खड्का, भुपलाल बोटे, र बालाराम कुमाल संलग्न रहेको पाइएको छ। बयानका लागि जिल्ला अदालतमा उपस्थित गराउँदा केही प्रतिवादीहरूले आलटाल गरेकाले वडाध्यक्ष वलीसहित अन्यलाई पक्राउ गरिएको हो।

डिभिजन वन कार्यालयले वडाध्यक्ष वलीलाई अब जिल्ला अदालतमा पेस गरी कानुनी कारबाही अघि बढाउने तयारी गरिरहेको छ।

• Jigyasa media