जिज्ञासा नेपाल | पनौती, जेठ १५

"बालमैत्री योजना, बालबालिकाको सहभागिता" भन्ने मूल नारासहित आज पनौती नगरपालिका वडा नं. ५ मा आयोजित वडा स्तरीय बाल भेला कार्यक्रम बाल अधिकार र सहभागी बजेट अभ्यासको उत्कृष्ट नमूनाका रूपमा सम्पन्न भएको छ।

पनौती–५ वडाको आयोजनामा र वडा बाल सञ्जालको समन्वयमा आयोजित  भेलामा बालबालिकाले आफ्नै आवाजमा आफ्ना प्राथमिकता, आवश्यकताहरू र समस्याहरू प्रस्तुत गर्दै आगामी आ.व. ०८२/०८३ का लागि योजना छनोट प्रक्रियामा सहभागिता जनाए।

** ४४ बालबालिकाको उत्साही सहभागिता**

बाल सञ्जालका अध्यक्ष सृजा चौलागाईंको सभापतित्वमा सम्पन्न कार्यक्रममा वडा अध्यक्ष विनोद खत्री, वडा सदस्य सविता थापा, उजेली मिजार, पनौती–४ की बालमैत्री सहजकर्ता ललिता धितालसहितको उपस्थिति रहेको थियो। कार्यक्रमको सञ्चालन बाल सञ्जालका सचिव निलम देउजा, स्वागत मन्तव्य उपाध्यक्ष जेसन थापा, तथा सहजिकरण बालमैत्री सहजकर्ता गिता तिमल्सिनाले गर्नुभएको थियो।

** बालदृष्टिकोणबाट योजना छनोट**

बालबालिकाको दृष्टिकोण, अनुभूति र चाहनालाई बुझ्न तथा योजना निर्माण प्रक्रियामा उनीहरूको सरोकार समेट्न चारवटा प्रभावकारी टुल्स प्रयोग गरिएको थियो: १. सुरक्षित र असुरक्षित स्थान पहिचान

२. मन पर्ने र मन नपर्ने स्थानको अभिव्यक्ति

३. शरीर नङसाङ्कन (Body Mapping) अभ्यास

४. परिकल्पना अभ्यास (Dream Mapping)

यस अभ्यासमार्फत बालबालिकाले विद्यालय, खेलमैदान, बाटोघाटो, सार्वजनिक शौचालय, स्वास्थ्य सेवा, साइबर सुरक्षाजस्ता मुद्दामा आफ्ना आवाज राख्न पाए।

कार्यक्रममा सहभागी १२ वर्षीया एक छात्राले भनिन्, "हामीले पहिलोपटक आफ्ना कुराहरू योजना बन्नुअघि राख्न पायौं, यो हाम्रो अधिकार हो भन्ने महसुस गरियो।"

बाल अधिकार र स्थानीय योजना तर्जुमा प्रक्रियामा बाल सहभागितालाई सुनिश्चित गर्ने यो अभ्यासले पनौती नगरपालिका–५ लाई साच्चै बालमैत्री वडा बनाउन थप ऊर्जा दिएको छ। कार्यक्रमका सबै सहभागी, अतिथि, बालबालिका र सहयोगीलाई आयोजकले हार्दिक धन्यवाद ज्ञापन गरेको छ ।

पनौती–५ को यो अभ्यास नेपालका अन्य स्थानीय तहहरूका लागि पनि प्रेरणादायी उदाहरण बन्न सक्छ, जहाँ योजना ठूला मानिसहरूले होइन, भविष्यका कर्णधार बालबालिकाले पनि बनाउने प्रक्रियालाई स्थान दिइएको छ।

• Jigyasanepal