काठमाडौं, माघ २४ – काठमाडौंको कमलपोखरीस्थित सानदार म:म पसलमा ग्याँस सिलिन्डर विस्फोट हुँदा ११ जना घाइते भएका छन्। घाइतेमध्ये एकजनाको अवस्था गम्भीर रहेको प्रहरीले जनाएको छ।
आज बिहान करिब पौने नौ बजे म:म पसलको भान्सामा विस्फोट हुँदा पसल रहेको घरको भुइँतलाको सिलिङ भत्किएको छ भने माथिल्लो तलाका झ्यालका सिसा समेत फुटेका छन्।
विस्फोटपछि प्रहरीका गाडी र एम्बुलेन्सहरू तुरुन्तै घटनास्थल पुगेका थिए। उद्धारमा मालीगाउँ प्रहरी वृत्तबाट डीएसपीको कमाण्डमा प्रहरी टोली परिचालित भयो। प्रारम्भिक उपचारका लागि घाइतेहरूलाई हिमाल अस्पताल लगिएको थियो, तर पछि थप उपचारका लागि सबैलाई कीर्तिपुरस्थित बर्न अस्पताल स्थानान्तरण गरिएको छ।
प्रहरीका अनुसार १४ जना प्रभावितमध्ये ३ जनालाई अस्पताल भर्ना गर्नु आवश्यक नपरेको जनाइएको छ।
ग्याँस विस्फोटबाट हुने जोखिम कम गर्न सावधानी
अपनाऔं!
- Jigyasa media
