काठमाण्डौ ।

श्रीमानको हत्या गरेको आरोपमा प्रहरीले एक महिलालाई पक्राउ गरेको छ। महिलाले घरायसी विवाद हुँदा दाउले हानेर श्रीमानको हत्या गरेको आरोपमा एक महिलालाई पक्राउ गरिएको अर्घाखाँची प्रहरीले जनाएको छ।  

छत्रदेव गाउँपालिका–३ शिख्रकी २७ वर्षीया मेखमाया कुमालले गएराति सुतिरहेका ३८ वर्षीय श्रीमान रामु कुमालको टाउकोमा दाउ प्रहार गरी हत्या गरेको आरोपमा पक्राउ गरिएको जिल्ला प्रहरी कार्यालय अर्घाखाँचीका प्रमुख डिएसपी चक्रबहादुर मल्लले बताए।  

प्रहरीका अनुसार शनिबार साँझ श्रीमान–श्रीमतीबीच सामान्य घरायसी विवाद भएको थियो। सोही विवादको आवेगमा मेखमायाले राति श्रीमान निदाएको बेला हत्या गरेको प्रारम्भिक अनुसन्धानबाट खुलेको प्रहरीले जनाएको छ।

हत्यामा प्रयोग भएको दाउसहित मेखमायालाई पक्राउ गरिएको प्रहरीले जनाएको छ। पक्राउ परेकी मेखमायामाथि थप अनुसन्धान भइरहेको जिल्ला प्रहरी कार्यालयका प्रमुख डिएसपी मल्लको भनाइ छ। 

• Jigyasanepal