वासिङ्टन, माघ २५ – अमेरिकाको अलास्का राज्यमा बिहीबार १० जना यात्रु सवार एउटा सानो व्यावसायिक विमान बेपत्ता भएको छ। सम्भावित दुर्घटनाको आशंका गर्दै खोजी तथा उद्धार कार्य तीव्र पारिएको छ।

अलास्का राज्य प्रहरीले दिएको जानकारीअनुसार, बेरिंग एयर क्याराभान नामक उक्त विमानमा ९ जना यात्रु र एक पाइलट सवार थिए। स्थानीय समयअनुसार दिउँसो ४ बजे उनालाक्लिटबाट नोम गन्तव्यतर्फ उडेको विमान निर्धारित समयसम्म गन्तव्यमा नपुगेपछि सम्पर्कविहीन भएको हो।

यी दुई सहर नोर्टन साउण्ड क्षेत्रमा करिब २३५ किलोमिटर (१४६ माइल) को दूरीमा रहेका छन्। खोजी तथा उद्धार टोलीहरूले विमानको अन्तिम लोकेसन ट्र्याक गर्न प्रयास गरिरहेको बताइएको छ।

अमेरिकामा पछिल्लो समय हवाई दुर्घटनाका घटनाहरू

हालै अमेरिका विभिन्न हवाई दुर्घटनाका घटनाहरूबाट प्रभावित हुँदै आएको छ। जनवरी ३० मा वासिङ्टन डिसीमा अमेरिकी सेनाको हेलिकप्टरसँग यात्रुबाहक विमान ठोक्किँदा ६७ यात्रुको मृत्यु भएको थियो।

त्यस्तै, फिलाडेल्फियाको एक व्यस्त क्षेत्रमा मेडिकल विमान दुर्घटनाग्रस्त हुँदा सात जनाको मृत्यु हुनुका साथै १९ जना घाइते भएका थिए।

अलास्कामा बेपत्ता भएको विमानबारे थप विवरण आउन बाँकी छ। खोजी तथा उद्धार कार्य जारी छ।

(नयाँ अपडेट प्राप्त हुनेबित्तिकै जानकारी गराइनेछ।)

• Jigyasa media