चितवन। भरतपुर अस्पतालमा उपचारका क्रममा एक महिलाको मृत्यु भएपछि घटनाको छानबिन गर्न नौ सदस्यीय समिति गठन गरिएको छ। भरतपुर महानगरपालिका–१२ की, हाल गैँडाकोट बस्ने, सम्झना काफ्लेको उपचारका क्रममा मृत्यु भएको थियो।

जिल्ला प्रशासन कार्यालयमा आज बसेको बैठकले भरतपुर अस्पतालका वरिष्ठ फिजिसियन डा. प्रकाश खतिवडाको संयोजकत्वमा नौ सदस्यीय छानबिन समिति गठन गरेको हो।

समितिमा बीपी कोइराला मेमोरियल क्यान्सर अस्पतालका एनेस्थेसियोलोजिस्ट डा. प्रदीप थापा, प्रहरी निरीक्षक विवेक घिमिरे, राष्ट्रिय अनुसन्धान विभागका अनुसन्धान अधिकृत अजय शर्मा, जिल्ला प्रशासन कार्यालयका अधिकृत अन्तिम सिञ्जाली, र पीडित पक्षबाट रमेश काफ्ले, राजेन्द्र ढकाल, र मन्दिरा काफ्ले सदस्यका रूपमा रहेका छन्। तुलसीराम आचार्य सदस्यसचिवका रूपमा रहेका छन् भन्ने जानकारी प्रमुख जिल्ला अधिकारी इन्द्रदेव यादवले दिएका छन्।

समितिलाई एक साताभित्र अध्ययन प्रतिवेदन बुझाउन कार्यादेश दिइएको छ। अस्पताल प्रशासनले पनि आन्तरिक रूपमा छानबिन समिति गठन गरेको छ। छानबिन समितिको प्रतिवेदनपछि आवश्यक कारबाही अगाडि बढाउने र मृतकको शव आफन्तले अन्तिम संस्कारका लागि लैजाने निर्णयसमेत भएको जिल्ला प्रशासन कार्यालयले जनाएको छ। मृतकका परिवारले चिकित्सकको लापरबाहीका कारण घटना भएको भन्दै शव बुझ्न अस्वीकार गरेका थिए। 

(रासस)

• RSS