बनेपा, काभ्रे — बनेपा ब्वाइज क्लब (विवीसी) द्वारा आयोजना गर्न लागिएको पाँचौं संस्करणको बनेपा महोत्सव २०८१ विवादको भुमरीमा परेको छ। झन्डै दुई सय व्यवसायीहरूले महोत्सवको विरुद्ध आवाज उठाउँदै बनेपा नगरपालिकामा हस्ताक्षरित ध्यानाकर्षण पत्र बुझाएका छन्। 

विवादको मुख्य कारण बनेको महोत्सवलाई व्यवसायीहरूले दशैंको मुखमा हुने व्यापारमा नकारात्मक प्रभाव पार्ने आरोप लगाएका छन्। उनीहरूका अनुसार विगतमा आयोजित महोत्सवहरूले स्थानीय व्यवसायीहरूको हितको संरक्षण गर्न नसकेको र सीमित व्यक्तिहरूले मात्रै यसबाट फाइदा उठाएको छ। यस पटक पनि त्यस्तै स्थिति दोहोरिने चिन्ता व्यक्त गर्दै व्यवसायीहरू महोत्सवलाई रोक्न माग गरिरहेका छन्।

ध्यानाकर्षण पत्रमा, व्यवसायीहरूले २०७२ सालको भुईंचालो, त्यसपछिको भारतीय नाकाबन्दी, र २०७६ मा सुरु भएको कोरोना महामारीले थलिएको व्यापार अझैसम्म उकासिन नसकेको बताएका छन्। “व्यवसायले अझैसम्म गति लिएको छैन, हामीले दशैं–तिहारका ठूला चाडपर्वमा व्यापार केही सुधार होला भनेर आशा गरेका थियौं,” पत्रमा उल्लेख गरिएको छ।

उक्त महोत्सवको विरुद्धमा गरिएको विरोधले केवल सीमित नाफा कमाउने धन्दामा सीमित भएको भन्दै व्यवसायीहरूले ठेक्का प्रथामा आधारित भएको आरोप पनि लगाएका छन्। केही व्यवसायीले यस कार्यक्रमले व्यावसायिक प्रबर्द्धनभन्दा पनि आन्तरिक फाइदाका लागि गरिएको दाबी गर्दै आएका छन्।

विवाद चुलिएसँगै केही दिनअघि आयोजित पत्रकार सम्मेलनमा आयोजक क्लबले महोत्सवको औचित्यबारे प्रष्ट पारेको थियो। उनीहरूले महोत्सवलाई व्यापार प्रवर्द्धनसँगै खेलकुद र संस्कृति जगेर्ना गर्ने उद्देश्यले आयोजना गर्न लागेको बताए। तर, व्यवसायीहरूको असहमति भने झनै बढ्दै गएको छ।

व्यवसायीहरू आक्रोशित हुँदै महोत्सव रोक्न नगरपालिकालाई ठोस कदम चाल्न आग्रह गरिरहेका छन्। उनीहरूले यदि महोत्सव रोकिएन भने आन्दोलन गर्ने चेतावनी पनि दिएका छन्। 

यस स्थितिमा बनेपा नगरपालिकाले के कदम चाल्छ भन्ने कुरा सबैको चासोको विषय बनेको छ।

• Jigyasanepal