🔸 कोसी, बागमती, गण्डकी र लुम्बिनी प्रदेशमा धेरै भारी वर्षाको चेतावनी

🔸 देशभर मेघगर्जन, चट्याङसहित पानी पर्न सक्ने
🔸 हिमाली भेगमा हल्का वर्षा वा हिमपात पनि सम्भावित

काठमाडौं, असार ५ –
आज देशभर पानी पर्ने मौसमविद्हरूको अनुमान छ। जल तथा मौसम विज्ञान विभागअन्तर्गतको मौसम पूर्वानुमान महाशाखाले असार ५ गते बिहीबार बिहान ६ बजे जारी गरेको बुलेटिनमा, सातै प्रदेशमा वर्षा हुने सम्भावना औंल्याइएको छ।

दिउँसो:
– सबै प्रदेशका केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ।
– विशेषगरी कोसी, बागमती, गण्डकी र लुम्बिनी प्रदेशका एक–दुई स्थानमा भारीदेखि धेरै भारी वर्षा हुन सक्ने चेतावनी दिइएको छ।
– उच्च पहाडी र हिमाली भेगका केही स्थानमा हल्का वर्षा वा हिमपात पनि हुन सक्छ।

रातिको पूर्वानुमान:
– कोसी, बागमती, गण्डकी, लुम्बिनी र सुदूरपश्चिम प्रदेशका केही स्थानहरूमा वर्षा अपेक्षित छ।
– मधेस प्रदेश समेत समेटिँदै, यीमध्येका केही भागहरूमा भारीदेखि धेरै भारी वर्षा पनि हुन सक्छ।
– हिमाली भेगमा राति पनि हिमपात वा हल्का वर्षाको सम्भावना छ।

🌧️ कति पानी परे कस्तो वर्षा मानिन्छ?

मौसमविद्हरूका अनुसार,

• १० मिमीभन्दा कम वर्षा = हल्का
• १०–५० मिमी = मध्यम
• ५०–१०० मिमी = भारी
• १००–२०० मिमी = धेरै भारी
• २०० मिमीभन्दा बढी = अति भारी वर्षा

🗺️ ‘एक–दुई स्थान’, ‘केही ठाउँ’ भन्नाले के जनाइन्छ?

• एक–दुई स्थान: सम्बन्धित प्रदेशको १०% भन्दा कम क्षेत्रफल
• थोरै ठाउँ: १०%–३०%
• केही स्थान: ३०%–५०%
• धेरै स्थान: ५०%–८०%
• अधिकांश स्थान: ८०% भन्दा बढी क्षेत्रफलमा पानी पर्ने अनुमान

🌬️ हालको मौसमीय स्थिति

मनसुन हाल कोसी, मधेस, बागमती, गण्डकीका केही भाग र लुम्बिनीको पूर्वी भागसम्म फैलिएको छ। बाँकी क्षेत्रमा भने अझै पश्चिमी वायु र स्थानीय वायुको प्रभाव छ।

• Jigyasanepal