सुनसरी, असार १५ ।

सुनसरीको रामधुनी नगरपालिका–७ स्थित चतरा–कान्छी सडकखण्डमा गएराति भएको भीषण मोटरसाइकल दुर्घटनामा बाबुछोरासहित तीन जनाको ज्यान गएको छ भने दुई जना गम्भीर घाइते भएका छन्।

को३३प ९६०५ नम्बरको मोटरसाइकल कालाबन्जारतर्फ जाँदै गर्दा विपरीत दिशाबाट आइरहेको प्रदेश १–०२–०५६प ५८६४ नम्बरको मोटरसाइकलसँग चोकमा एकआपसमा ठोक्किँदा दुर्घटना भयावह भएको जिल्ला प्रहरी कार्यालय सुनसरीले जनाएको छ।

दुर्घटनामा ज्यान गुमाउनेमा इनर्चन चौधरी (३४ वर्ष), उनका ९ वर्षीय छोरा प्रनिष चौधरी, र अर्को मोटरसाइकलका चालक बिन्दु यादव (५१ वर्ष) रहेका छन्। तीनै जनालाई घाइते अवस्थामा तत्कालै धरानस्थित बिपी कोइराला स्वास्थ्य विज्ञान प्रतिष्ठान पुर्‍याइएको थियो। तर उपचारका क्रममा उनीहरूको मृत्यु भएको प्रहरी स्रोतले पुष्टि गरेको छ।

मृतक इनर्चन चौधरीसँगै सवार उनकी श्रीमती गम्भीर घाइते

दुर्घटनामा इनर्चन चौधरीसँगै सवार उनकी श्रीमती प्रतीक्षा चौधरी (३२ वर्ष) र बिन्दु यादवसँगै पछाडि सवार इटहरी–७ निवासी रमेश चौधरी (३६ वर्ष) गम्भीर घाइते भएका छन्। उनीहरूको पनि बिपी कोइराला स्वास्थ्य विज्ञान प्रतिष्ठानमै उपचार भैरहेको छ।

परिवारको एकैपटक उजाडिने पीडा

एकैपटक बुवा–छोराको निधन हुनुका साथै श्रीमतीको गम्भीर अवस्था भएपछि इनर्चन चौधरीको परिवारमा गहिरो शोक छाएको छ। स्थानीयवासीका अनुसार चौधरी परिवार मेहनती र सहयोगी स्वभावका थिए। यस्तो दुर्घटनाले स्थानीय समाजलाई समेत मर्माहत बनाएको छ।

दुर्घटनाको कारणबारे अनुसन्धान जारी

जिल्ला प्रहरी कार्यालय सुनसरीले घटनाको अनुसन्धान सुरु गरेको जनाएको छ। प्रारम्भिक विवरणअनुसार दुबै सवारी तीव्र गतिमा रहेकाले एकआपसमा ठक्कर खाँदा ठूलो मानवीय क्षति भएको हुनसक्ने आशंका गरिएको छ।

घटनास्थलमा तत्कालै उद्धार टोली खटिएको र गम्भीर घाइतेहरूको अवस्था नाजुक भए पनि उपचार भइरहेको प्रहरीले जनाएको छ।

सडक सुरक्षा र गम्भीर चुनौती

सुनसरीको चतरा–कान्छी सडकखण्डमा यसअघि पनि पटक–पटक दुर्घटनाहरू हुने गरेका छन्। सडक साँघुरो, ट्राफिक व्यवस्थापन कमजोर र रातिको समयमा लाइट नहुनुजस्ता कारणले जोखिम बढाएको स्थानीयवासीहरू बताउँछन्।

यस घटनाले पुनः एकपटक सडक सुरक्षामाथि प्रश्न खडा गरिदिएको छ। मोटरसाइकल दुर्घटनामा परिवारै उजाडिने यस्ता घटनाहरूले सवारी सचेतनाको आवश्यकता झनै बलियो बनाएको छ।

• Jigyasanepal