जिज्ञासा नेपाल | काभ्रेपलाञ्चोक, जेठ १४

काभ्रेको स्वास्थ्य सेवामा ऐतिहासिक मोड!
प्रधानमन्त्री केपी शर्मा ओलीले धुलिखेल नगरपालिका–६ स्थित धुलिखेल अस्पताल परिसरमा अत्याधुनिक ट्रमा एण्ड इमर्जेन्सी सेन्टर भवनको आज शिलान्यास गर्नुभएको छ।

यो नेपाल–जापान स्वास्थ्य सहकार्यको नयाँ अध्याय हो। जापानी अनुदानमा बन्न लागेको सेन्टरले देशकै पूर्व–मध्य क्षेत्रमा आपत्कालीन उपचार सेवा अभूतपूर्व रुपमा विस्तार गर्ने अपेक्षा गरिएको प्रम ओलीले कार्यक्रमलाई सम्बोधन गर्दै बताउनुभएको छ ।

🏥 जापानको करिब ३ अर्ब यान बराबरको अनुदान

नेपाल सरकारको पहल र जापान अन्तर्राष्ट्रिय सहयोग एजेन्सी (JICA) को सहकार्यमा निर्माण हुने यस परियोजनामा जापान सरकारले थप ३ अर्ब २ करोड ९६ लाख यान बराबरको अनुदान प्रदान गर्ने भएको छ।

शिलान्यास कार्यक्रममा स्वास्थ्य तथा जनसंख्या मन्त्री प्रदीप पौडेल, संघीय सांसद् गोकुल बाँस्कोटा, स्थानीय जनप्रतिनिधि र स्वास्थ्यकर्मीको बाक्लो उपस्थिति थियो।

🤝 आर्थिक अभावपछि थप सहयोग : जापानी प्रतिबद्धता कायम

यद्यपि यो सम्झौतामा जापान र नेपालबीच सन् २०२३ मै हस्ताक्षर भइसकेको थियो। तर मूल्यवृद्धि र प्राविधिक कारणले गर्दा कार्यान्वयनमा ढिलाइ भयो। त्यसपछि जेठ २ गते नेपालका अर्थमन्त्री विष्णुप्रसाद पौडेल र जापानका संसदीय उपविदेशमन्त्री इकुइना अकिकोबीच पुनः सहमतिपत्रमा हस्ताक्षर भयो।

🏗️ के–के बन्छ ट्रमा सेन्टरमा?

पाँच तला उचाइको भवन तीनतले बेसमेन्टसहित हुनेछ। सुरक्षित र सुसज्जित सेवाका लागि आवश्यक सबै सुविधा यहाँ रहने छन्:

• ३ वटा अत्याधुनिक अपरेशन थिएटर
• आइसियु, एचडियु, ल्याब, फार्मेसी
• फोहोर व्यवस्थापन प्रणाली
• ठूलो पार्किङ क्षेत्र

भवन निर्माणमा जापान सरकारले ६०% लगानी गर्नेछ भने ४०% स्वास्थ्य उपकरण र उपकरण जडानमा खर्च हुनेछ।

🌍 धुलिखेल–जापान सहकार्यको नयाँ अध्याय

स्वास्थ्य पहुँचमा धुलिखेल अस्पतालले पहिल्यैदेखि उदाहरणीय काम गर्दै आएको छ। अब ट्रमा सेन्टरको निर्माणले गम्भीर दुर्घटना र आपत्कालीन अवस्थामा तत्काल उपचारको सुविधा सुनिश्चित गर्ने बताइन्छ। यो सेन्टर सिंगो बागमती र आसपासका जिल्लाका लागि जीवनदायी संरचना बन्ने बताइएको छ ।

✍️ जिज्ञासा नेपाल । काभ्रेबाट

• Jigyasanepal