वैशाख,१ २०८२| काठमाडौं

राजावादीहरूको तीनकुने प्रदर्शनका क्रममा भएको आगजनी र पत्रकार रवि रजकको मृत्यु प्रकरणमा दुर्गा प्रसाई निकट रहेको एटीएफ समूहका दुई युवकको संलग्नता पुष्टि भएको छ।

प्रहरीको अनुसन्धानमा रामेछाप सुनापाति गाउँपालिका–५ का २२ वर्षीय सरोज गौतम र अछामको पञ्चदेवल नगरपालिका–७ का २० वर्षीय गोकर्ण शाही दुर्गा प्रसाई नेतृत्वको एटीएफ (अल्टरनेटिभ टिभी फोर्स) समूहका सक्रिय कार्यकर्ता रहेको खुलेको हो। प्रहरीका अनुसार, सरोज गौतम उक्त समूहका प्रवक्ता हुन् भने शाही सदस्यका रूपमा परिचित छन्।

तीनकुनेमा भएको आगजनीका क्रममा, जहाँ पत्रकार रवि रजक बाँच्न नपाई जिउँदै जलाइए, त्यही घटनामा यी दुई युवाले प्रत्यक्ष संलग्नता देखाएको प्रहरीले पुष्ट्याएको छ। प्रहरीले जनाएको विवरण अनुसार, प्रदर्शनका क्रममा दुर्गा प्रसाईं आफैं सवार सवारी साधनमा झुण्डिएर यी युवकहरू प्रहरीमाथि दवाब सिर्जना गर्न अग्रपंक्तिमा थिए।

प्रहरीले दुर्गा प्रसाईको गाडी अघि बढ्न नदिएपछि आक्रोशित समूहले घरमा ढुंगामुढा र आगजनी गरेका थिए। यही क्रममा पत्रकार रजक बसोबास गरिरहेको घरमा आगो लाग्दा उनको जलेर मृत्यु भएको थियो।

त्यसैदिन गोकर्ण शाही माओवादी केन्द्रको कार्यालयमा समेत आगो लगाउन पुगेको प्रमाण प्रहरीले संकलन गरेको छ।

यस घटनाले पत्रकारको सुरक्षामाथि गम्भीर प्रश्न उठाएको छ। आम नागरिक र सञ्चारकर्मीहरूले आक्रोश व्यक्त गर्दै निष्पक्ष छानबिनको माग गरिरहेका छन्। दुर्गा प्रसाईको नेतृत्वमा भएको प्रदर्शन हिंसात्मक मोडमा पुगेपछि समाजिक सञ्जालमा समेत तीव्र प्रतिक्रिया देखिएको छ।

यसरी राष्ट्रवादको नारा लिएर सुरु भएको आन्दोलन अन्ततः निर्दोष नागरिकको ज्यान लिने अमानवीय र आपराधिक कृत्यमा परिणत भएको छ। अब प्रहरी र सरकारको कदम कति निष्पक्ष, पारदर्शी र प्रभावकारी हुन्छ — जनताको नजर त्यसैमा केन्द्रित हुनेछ।

• Jigyasa media