काठमाडौं — कञ्चनपुरको महेन्द्रनगरमा १३ वर्षीया बालिका निर्मला पन्तको बलात्कारपछि हत्या प्रकरणका सन्दर्भमा प्रत्यक्षदर्शीको दावी गर्ने गोरखाका नवराज अर्याल रिहा भएका छन्। केन्द्रीय अनुसन्धान ब्यूरो (सीआईबी)ले बुधबार उनलाई पन्त प्रकरणमा भ्रामक सूचना फैलाउने गरी अन्तर्वार्ता दिएको आरोपमा पक्राउ गरेको थियो।
प्रारम्भिक अनुसन्धानमा अर्यालले कसैको उक्साहटमा यस्तो झुठो बयान दिएको नभई आफूतिर ध्यान तान्न खोजेको बताएका थिए। यसका आधारमा बोलाएको बेला उपस्थित हुने शर्तमा हाजिर जमानतमा उनलाई रिहा गरिएको ब्यूरोका एक अधिकारीले जानकारी दिए।
अर्याल, जो आफू खानेपानी विभागको सवारी चालक रहेको बताउँछन्,ले दिएको विवरणअनुसार उनले कञ्चनपुरमा निर्मला पन्तको बलात्कारको घटनामा प्रत्यक्षदर्शीको रुपमा बयान दिएका थिए। साथै, यो प्रकरणमा अन्तर्वार्ता लिने पत्रकार ऋषि धमलासँग पनि प्रहरीले सोधपुछ गरेकोथियो।
- Jigyasa media
