काठमाडौं – विद्यार्थी बोकेको बस साँखुमा दुर्घटनामा परेर तीन जनाको मृत्यु भएको छ भने ४० जना घाइते भएका छन्।
नगरकोटबाट पिकनिक सकेर फर्कँदै गरेको स्कुल बस साँखु–नगरकोट सडकखण्डको कात्तिके क्षेत्र नजिक ब्रेक फेल भएर अनियन्त्रित भएपछि दुर्घटना भएको हो। दुर्घटनामा परी गम्भीर घाइते भएका तीन जनाको उपचारका क्रममा निधन भएको छ।
काठमाडौं प्रहरी प्रवक्ता एसपी अपिलराज बोहराका अनुसार घाइतेमध्ये एक जनाको शंखरापुर अस्पतालमा, एक जनाको एनएमसी अस्पतालमा, र अर्का एक जनाको त्रिवि शिक्षण अस्पतालमा निधन भएको हो।
दुर्घटनाग्रस्त बस (बा २ ख ७९५८) सुन्दरीमाई यातायातको हो, जसलाई चावहिलस्थित एसएस एकेडेमीले रिजर्भ गरेको थियो। दुर्घटनामा घाइते भएका ४० जना विभिन्न अस्पतालमा उपचाररत छन्।
प्रहरीले दुर्घटनाबारे थप अनुसन्धान गरिरहेको छ।
- Jigyasa media
