असोज १६, २०८२ बिहीबार । काठमाडौँ ।
बडादसैँको मुख्य दिन विजया दशमी आज देशभर हर्षोल्लासका साथ मनाइँदैछ। आजका दिन मान्यजनको हातबाट देवी नवदुर्गाको प्रसादस्वरूप टीका, जमरा र आशीर्वाद ग्रहण गर्ने परम्परा रहिआएको छ।
नेपाल पञ्चाङ्ग निर्णायक विकास समितिका अनुसार टीका लगाउन दिनभर उपयुक्त भए पनि उत्तम साइत आज बिहान ११ बजेर ५३ मिनेट मा रहेको छ।
यस दिन गुरु–पुरोहित, हजुरबुबा–हजुरआमा, आमा–बुबा र मान्यजनका हातबाट टीका र जमरा ग्रहण गर्ने धार्मिक तथा सांस्कृतिक मान्यता रहेको छ। देवी नवदुर्गाको प्रसादका रूपमा राखिएको जमरा र टीका लगाउँदा आशीर्वादसहित विजय, समृद्धि र दीर्घायुको कामना गरिन्छ।
टाढा रहेका लागि विशेष प्रावधान
मान्यजन टाढा हुनेहरूले भने आजै नभई विजया दशमीदेखि आश्विन शुक्ल पूर्णिमासम्म जुनसुकै दिन टीका–जमरा ग्रहण गर्न सक्ने परम्परा छ।
दशैँको सामाजिक महत्व
बडादसैँ केवल देवी दुर्गाको विजय पर्व मात्र नभई परिवार, इष्टमित्र र नातेदारबीच भेटघाट, माया र आत्मीयता साटासाट गर्ने पर्व पनि हो। आजको दिन बालबालिकादेखि वृद्धवृद्धासम्म सबै उमेरका मानिसले मान्यजनबाट आशीर्वाद ग्रहण गरी खुसीयालीका साथ पर्व मनाउँछन्।
-
Jigyasanepal
