काठमाडौं, चैत २१ – सर्वोच्च अदालतले कुलमान घिसिङले दायर गरेको रिटमा अन्तरिम आदेश दिन अस्वीकार गरेको छ। न्यायाधीश डा. कुमार चुडाल र नित्यानन्द पाण्डेयको संयुक्त इजलासले घिसिङको पक्षमा अन्तरिम आदेश नदिइ मुद्दालाई अग्राधिकार दिने निर्णय गरेको हो।
गत सोमबार मन्त्रिपरिषद्को बैठकले घिसिङलाई नेपाल विद्युत् प्राधिकरणको कार्यकारी निर्देशक पदबाट हटाई हितेन्द्रदेव शाक्यलाई नियुक्त गरेको थियो। आफूलाई अन्यायपूर्ण रूपमा हटाइएको भन्दै घिसिङले सर्वोच्चमा अन्तरिम आदेश माग गरेका थिए।
यसअघि, चैत १५ गते सर्वोच्चले प्रारम्भिक सुनुवाइ गर्दै सरकारलाई कारण देखाऊ आदेश जारी गरेको थियो। न्यायाधीश अव्दुल अजीज मुसलमानको एकल इजलासले घिसिङलाई हटाउनुको कारण स्पष्ट गर्न सरकारलाई निर्देशन दिएको थियो। अदालतले लिखित जवाफ माग्दै अन्तरिम आदेश दिने वा नदिनेबारे चैत १७ गते दुवै पक्षलाई छलफलका लागि बोलाएको थियो।
- Jigyasa media
