काठमाडौँ – संयुक्त राष्ट्रसंघीय बाल कोष (युनिसेफ) ले सुडानमा ३० लाखभन्दा बढी मानिसहरू हैजाको उच्च जोखिममा रहेको जानकारी दिएको छ। युनिसेफका अनुसार, पाँच वर्ष मुनिका करिब ६ लाख बालबालिकासहित लाखौं मानिसहरू हैजाबाट प्रभावित हुने सम्भावना रहेको छ।

यस स्वास्थ्य संकटको मुख्य कारण सन् २०२३ को अप्रिलमा भएको आन्तरिक द्वन्द्वलाई मानिएको छ। यस द्वन्द्वले गर्दा अत्यावश्यक खोपको उपलब्धता ८५ प्रतिशतबाट घटेर करिब ५० प्रतिशतमा झरेको छ। साथै, द्वन्द्वग्रस्त क्षेत्रमा रहेका ७० प्रतिशतभन्दा बढी अस्पतालहरू बन्द भएका छन्, र अग्रपङ्क्तिमा कार्यरत स्वास्थ्यकर्मीहरू महिनौंदेखि तलबविहीन रहेका छन्।

सुडानमा हैजासँगै मलेरिया र डेंगुजस्ता महामारी रोगहरू फैलिएका छन्, जसले सयौंको मृत्यु भइसकेको छ। सुडानको स्वास्थ्य मन्त्रालयले यस वर्ष अगस्टमा हैजा फैलावटको घोषणा गर्दै, द्वन्द्व, अशुद्ध पानीको प्रयोग, र बिग्रिँदो वातावरणीय अवस्थालाई मुख्य कारण मानेको छ।

सुडानको स्वास्थ्य संकटले गम्भीर रूप लिएको र तत्कालीन कदमहरू नचालिए ठूलो जनधनको क्षति हुने अनुमान गरिएको छ।

• Jigyasa media