काभ्रे । काभ्रेपलाञ्चोकको पाँचखाल नगरपालिका–३ चापेपिपलबोटस्थित भित्री सडकखण्डमा टिपरको ठक्करबाट गम्भीर घाइते भएकी साढे चार वर्षीया आरिका परियारको उपचारको क्रममा मृत्यु भएको छ।

मिति २०८१ साल वैशाख २ गते दिउँसो ३:१५ बजे रबिओपीबाट पाँचखालतर्फ आइरहेको बा.प्र. ०१–००४ क १८४५ नम्बरको टिपरले पैदलयात्रा गरिरहेकी आरिकालाई ठक्कर दिएको थियो।

उक्त टिपरको ठक्करबाट बालिका आरिका परियार गम्भीर घाइते भई, तत्कालै पाँचखाल पोलिक्लिनिकमा सामान्य उपचार पछि थप उपचारका लागि धुलिखेल अस्पताल लगिएको थियो। तर दुर्भाग्यवश, उक्त अस्पतालमा बेलुकी ४:४० बजे चिकित्सकले बालिकालाई मृत घोषणा गरे। आरिका, पाँचखालकै शक्ती परियारकी छोरी हुन्।

एक आम बालिका जसको जीवन बल्ल सुरू हुँदै थियो, एक्कासि सडकको निर्दयी सवारीले लुट्यो उनका सपना र भविष्य सहित परिवारको साथ छुट्यो ।

घटनाबारे थप अनुसन्धान भइरहेको जिल्ला प्रहरी कार्यालय काभ्रेका सूचना अधिकारी प्र.ना.उ. मिनबहादुर घलेले जानकारी दिएका छन्।

यस घटनाले फेरि एक पटक सडक सुरक्षाप्रति राज्यको लापरबाही, भारी सवारी साधनको अनियन्त्रित चाप र मासुमहरूको असुरक्षित यात्राप्रति गम्भीर प्रश्न उठाएको छ।

पाँचखालको स्थानीय समुदायमा शोक र आक्रोश दुवै व्याप्त छ।

• Jigyasa media