बारा । बाराको निजगढ क्षेत्रमा भएको सवारी दुर्घटनामा परी दुई जनाको ज्यान गएको छ।
शुक्रबार दिउँसो सवा ३ बजेतिर निजगढदेखि करिब १० किमी पश्चिम पट्टि टिप्पर र कार एक आपसमा ठोक्किँदा ज्यान जाने घटना घटेको हो।
पूर्वबाट पश्चिमतर्फ जाँदै गरेको प्रदेश २–०३–००१ ख ०६०७ नम्बरको टिप्पर र विपरीत दिशाबाट आइरहेको बा ०१–०२५ च ५०७६ नम्बरको कार बीच तीव्र गतिमा ठक्कर भएको थियो।
दुर्घटनामा सर्लाही निवासी कार चालक जितनारायण साह र सोही कारमा सवार नारायणहरी शर्मा गम्भीर घाइते भएका थिए। दुबैलाई उपचारका लागि निजगढको प्रसूति अस्पताल लगिएको थियो, तर उपचारको क्रममा दुबैजनालाई मृत घोषणा गरिएको बाराका प्रहरी प्रमुख एसपी सन्तोष तामाङले जानकारी दिए।
दुर्घटनापछि टिप्पर चालक भने फरार रहेको र उनको खोजी जारी रहेको प्रहरीले जनाएको छ। घटनास्थलमा दुबै सवारीसाधन यथावत छन् भने सडक आवागमनमा भने अवरोध नरहेको प्रहरीको भनाइ छ।
- A
