काठमाण्डौ ।देशमा अहिले स्थानीय र पश्चिमी वायुको आंशिक प्रभाव सक्रिय रहेको जल तथा मौसम पूर्वानुमान महाशाखाले जनाएको छ। यस प्रणालीको प्रभावका कारण आज देशका केही भागमा बदली र वर्षाको सम्भावना देखिएको हो।

कोशी, बागमती, गण्डकी र कर्णाली प्रदेशका पहाडी भेगमा दिउँसो आंशिकदेखि सामान्य बदली रहनेछ भने बाँकी प्रदेशहरूमा मौसम खुला रहने अनुमान गरिएको छ।

कोशी र गण्डकी प्रदेशका पहाडी क्षेत्रमा केही स्थानहरूमा मेघगर्जन, चट्याङसहित हल्कादेखि मध्यम वर्षा हुने सम्भावना रहेको महाशाखाले जनाएको छ।

त्यस्तै, उच्च पहाडी र हिमाली भू–भागहरूमा समेत हल्का वर्षा र हिमपात हुन सक्ने पूर्वानुमान गरिएको छ। विशेष गरी कोशी, बागमती, गण्डकी र कर्णाली प्रदेशका हिमाली भेगमा सावधानी अपनाउन महाशाखाले आग्रह गरेको छ।

रातिको मौसम पनि यस्तै रहने देखिन्छ। कोशी र गण्डकी प्रदेशका पहाडी क्षेत्रमा आंशिक बदली रहनेछ भने अन्य क्षेत्रमा मौसम खुला रहनेछ। राति पनि उच्च पहाडी तथा हिमाली भू–भागमा हल्का वर्षा र हिमपात हुने सम्भावना कायमै रहेको छ।

यात्रा गर्नेहरू, किसान र हिमाली क्षेत्रका बासिन्दाहरूलाई सतर्क रहन मौसमविद्‌हरूको सुझाव रहेको छ।

• Jigyasanepal