काठमाडौं, वैशाख १९ —

आज शुक्रबार देशभर मौसम बदली रहने र केही प्रदेशमा वर्षा तथा उच्च पहाडी भेगमा हिमपात हुन सक्ने सम्भावना रहेको छ। मौसम पूर्वानुमान महाशाखाले आज बिहान ६ बजे जारी गरेको बुलेटिनअनुसार दिनभर आंशिकदेखि सामान्य बदली रहनेछ।

कोसी, बागमती, गण्डकी, कर्णाली र सुदूरपश्चिमका हिमाली क्षेत्रका केही स्थानमा हल्का वर्षा वा हिमपात हुने सम्भावना छ। त्यस्तै, कोसी प्रदेशलगायतका पहाडी भेगमा मेघगर्जन र चट्याङसहित हल्का वर्षा हुनसक्ने महाशाखाको अनुमान छ।

राति पनि मौसम पूर्णरूपमा खुल्ने छैन। कोसी, गण्डकी र कर्णाली प्रदेशका पहाडी क्षेत्रमा आंशिकदेखि सामान्य बदली रहनेछ भने बाँकी स्थानमा मौसम आंशिक खुल्ने देखिएको छ। कोसी र गण्डकीका केही उच्च भागमा राति पनि मेघगर्जनसहित हल्का वर्षा र हिमपातको सम्भावना कायमै रहेको छ।

हाल देशमा पश्चिमी वायु, स्थानीय वायु र बंगालको खाडीबाट आएको जलवाष्पयुक्त हावाको मिश्रित प्रभाव सक्रिय रहेको जनाइएको छ, जसका कारण मौसममा उतारचढाव देखिएको हो।

सावधानी अपनाउन मौसमविद्हरूको सुझाव

यात्रा वा बाहिरी गतिविधिमा संलग्न हुनेहरूले मौसम अनुसार तयारी गर्नुपर्ने मौसमविद्हरूले सुझाएका छन्। विशेष गरी पहाडी र हिमाली क्षेत्रमा यात्रा गर्नेहरूले आवश्यक सतर्कता अपनाउनुपर्नेछ।

• Jigyasanepal