काठमाडौँ, ६ कात्तिक – भारतको भिस्तारा एयरको विमानमा बम राखिएको हल्लापछि त्रिभुवन अन्तर्राष्ट्रिय विमानस्थलमा नेपाली सेनाको टोलीले व्यापक खोजतलासी थालेको छ। नयाँ दिल्लीबाट काठमाडौँ आएको भिस्तारा एयरको फ्लाइटमा बम रहेको फोन सूचना दिल्लीबाट प्राप्त भएपछि सेनाको विशेष बम निष्क्रिय गर्ने टोलीले तुरुन्तै विमानमा खोजी कार्य प्रारम्भ गरेको हो।

सेनाका प्रवक्ता गौरवकुमार केसीका अनुसार, यात्रुहरूलाई सुरक्षित ठाउँमा राखेर विमानको ह्याण्ड ब्यागेज तथा अन्य सामानहरू जाँच गरिएको छ। अहिलेसम्म कुनै शंकास्पद वस्तु फेला नपरेको जानकारी गराइएको छ। विमानमा बम रहेको सूचना दिल्लीबाट प्राप्त भएको थियो, जसको आधारमा अनुसन्धान भइरहेको छ।

नेपाल नागरिक उड्डयन प्राधिकरणका सूचना अधिकारी ज्ञानेन्द्र भूलका अनुसार, विमानका सबै सामानहरूको चेकजाँच भइरहेको छ। उडानहरू भने नियमित रूपमा सञ्चालनमा रहेका छन्, तर भिस्ताराको विमान नजिक अन्य विमानहरूलाई पार्किङ अनुमति दिइएको छैन।

• Jigyasa media