२३ पुस, काठमाडौं । चीनको तिब्बतमा मंगलबार बिहान गएको शक्तिशाली भूकम्पमा परी हालसम्म ५३ जनाको ज्यान गएको छ। भूकम्पका कारण एक हजारभन्दा धेरै घरमा क्षति पुगेको जनाइएको छ।
चिनियाँ सञ्चारमाध्यमका अनुसार, भूकम्प ६.८ म्याग्निच्युडको थियो। यस भूकम्पमा परेर ६३ जना घाइते भएका छन्। घटनाले व्यापक जनधनको क्षति गराएको बीबीसीले जनाएको छ।
नेपालको राष्ट्रिय भूकम्प मापन तथा अनुसन्धान केन्द्रका अनुसार, बिहान ६:५० (नेपाली समय) मा तिब्बतको दिंगी आसपास केन्द्रविन्दु भएर ७ म्याग्निच्युडको भूकम्प गएको हो।
भूकम्पको धक्का काठमाडौंसहित नेपालको विभिन्न स्थानमा महसुस गरिएको थियो। तर, नेपालमा हालसम्म कुनै ठूलो क्षतिको विवरण प्राप्त नभएको प्रहरीले जनाएको छ।
यस विनाशकारी घटनाले तिब्बत क्षेत्रका बासिन्दाको जीवनमा गहिरो प्रभाव पार्न सकेको छ। उद्दार कार्य जारी रहेको र थप विवरण आउन बाँकी रहेको छ।
- Jigyasa media
