जिज्ञासा नेपाल | जेठ २५, २०८२, आइतबार | काठमाडौँ

काठमाडौँको बौद्धमा गएराति भएको सडक दुर्घटनामा एक वृद्धको ज्यान गएको छ। राजधानीको बौद्धस्थित रामहिटीमा साढे ११ बजे तिर टिपरले ठक्कर दिँदा करिब ६५ वर्षीय पुरुषको घटनास्थलमै मृत्यु भएको हो। मृतकको सनाखत भने अझै भइसकेको छैन।

टिपर ठक्करपछि भाग्यो, चालक काभ्रेबाट समातिए
दुर्घटनापछि बागमती प्रदेश-०१-००६ ख ५५०८ नम्बरको टिपर लिएर फरार भएका चालकलाई प्रहरीले काभ्रेको मण्डनदेउपुर नगरपालिका–६ बाट नियन्त्रणमा लिएको छ। पक्राउ परेका चालक २८ वर्षीय अजय श्रेष्ठ रहेको उपत्यका ट्राफिक प्रहरी कार्यालयका प्रवक्ता एसपी दीपक गिरीले जानकारी दिए।

"दुर्घटनापछि चालक भागेका थिए, खोजतलासपछि काभ्रेबाट पक्राउ गरियो", एसपी गिरीले बताए। हाल उनलाई काठमाडौँ ल्याउने प्रक्रिया अगाडि बढाइएको छ भने घटनाको थप अनुसन्धान भइरहेको प्रहरीले जनाएको छ।

अनुसन्धान जारी
टिपरको ठक्करबाट ज्यान गुमाएका वृद्धको शव पोस्टमार्टमका लागि अस्पतालमा पठाइएको छ। सनाखत भइनसकेको मृतकको परिचय खुलाउन प्रहरीले सर्वसाधारणसँग पनि सहयोग मागेको छ।

🚨 सावधानी अपनाऔं!
सडकमा विशेषगरी रातको समयमा ठूलो सवारीसाधनसँग सावधानीपूर्वक हिँड्न तथा सवारी चालकले गति नियन्त्रण गर्नुपर्ने प्रहरीको अनुरोध रहेको छ।

• Jigyasanepal