१६ माघ, काठमाडौं । तराईका धेरैजसो स्थानमा अहिले बाक्लो हुस्सुले ढाकिएको छ, जसले जनजीवनमा प्रत्यक्ष असर पारेको छ। जल तथा मौसम विज्ञान विभागका अनुसार हुस्सु केही दिनसम्म यथावत् रहने सम्भावना रहेको छ।

तराई क्षेत्रमा फैलिएको हुस्सुले दैनिक जनजीवन, कृषि, स्वास्थ्य, यातायात, र हवाई उड्डयनमा प्रभाव पार्न सक्ने भएकाले सम्बन्धित सबैलाई सतर्क रहन मौसमविद्हरूले आग्रह गरेका छन्।

मौसमविद् रोजन लामिछानेका अनुसार आज काठमाडौं उपत्यकामा आंशिक बदलीको अवस्था रहनेछ, जसले तापक्रम केही घट्न सक्नेछ।

देशभरको मौसम अवस्था

जल तथा मौसम विज्ञान विभागका विवरणअनुसार आज दिउँसो पहाडी भू-भागमा आंशिकदेखि साधारण बदली रहन सक्छ भने अन्य स्थानहरूमा मौसम सफा रहने अपेक्षा छ। साथै, कोशी, कर्णाली, र सुदूरपश्चिम प्रदेशका केही पहाडी स्थानमा हल्का वर्षाको सम्भावना छ। उच्च पहाडी तथा हिमाली क्षेत्रहरूमा छिटफुट हिमपात हुनसक्ने आँकलन गरिएको छ।

रातिको समयमा पनि देशका पहाडी भू-भागहरूमा आंशिक बदली कायम रहनेछ। कोशी, गण्डकी, र कर्णाली प्रदेशका उच्च स्थानहरूमा हल्का हिमपातको सम्भावना यथावत् छ।

सतर्कता र पूर्वतयारी

आगामी २४ घण्टामा कोशी, कर्णाली, र सुदूरपश्चिम प्रदेशका पहाडी भू-भागका एक-दुई स्थानमा हल्का वर्षा हुने सम्भावना रहेको छ। त्यस्तै, उच्च पहाडी तथा हिमाली भागहरूमा हिमपातले थप चिसो बढाउने भएकाले स्थानीयलाई सतर्कता अपनाउन आग्रह गरिएको छ।

मौसमको यो अवस्थाले यात्रुहरूलाई विशेष सतर्कता अपनाउन, विमानसेवा कम्पनीहरूलाई तयारी अवस्थामा रहन, र कृषिमा संलग्न किसानहरूलाई आफ्नो उत्पादन जोगाउन आवश्यक कदम चाल्नअनुरोध गरिएको छ।

• Jigyasa media