काठमाडौँ, साउन २७, मंगलबार –

मनसुनको न्यूनचापीय रेखा नेपालको तराई भूभाग नजिक सरिसकेकाले आज (मंगलबार) देशभर मौसम बदली र व्यापक वर्षाको सम्भावना अत्यधिक बढेको छ। मौसम पूर्वानुमान महाशाखाका अनुसार दिउँसोदेखि रातिसम्म देशका धेरै स्थानमा मध्यमदेखि भारी वर्षा हुनसक्छ, केही ठाउँमा धेरै भारी वर्षा पनि पर्न सक्छ।

महाशाखाले बिहान ६ बजे जारी गरेको २४ घण्टे बुलेटिनमा चेतावनी दिँदै, कोसी, बागमती, गण्डकी र मधेस प्रदेशका पहाड तथा तराई भूभागहरूमा उच्च सतर्कता अपनाउन आग्रह गरेको छ। विशेषगरी मधेस, कोसी र बागमती प्रदेशका केही स्थानमा भारीदेखि धेरै भारी वर्षा पर्न सक्ने अनुमान छ, जसले पहिरो, बाढी तथा डुबानको जोखिम बढाउन सक्छ।

आजको मौसम विवरण

दिउँसो – देशभर साधारणतया बदली। पहाडी भूभागका धेरै स्थान र तराईका केही भागमा मध्यम वर्षा। कोसी प्रदेशका पहाडमा एक–दुई स्थानमा भारी वर्षा।

राति – पूर्णतया बदली। मधेस, कोसी, बागमती, गण्डकी र लुम्बिनी प्रदेशका पहाड तथा तराई भूभागमा धेरै स्थानमा मध्यम वर्षा।

मधेस, कोसी र बागमतीका थोरै स्थानमा भारीदेखि धेरै भारी वर्षा; गण्डकीका पहाड र लुम्बिनीका तराईमा एक–दुई स्थानमा भारी वर्षा।

वर्षाको मापदण्ड (२४ घण्टा)

हल्का वर्षा – १० मिमीभन्दा कम

मध्यम वर्षा – १० देखि ५० मिमी

भारी वर्षा – ५० देखि १०० मिमी

धेरै भारी वर्षा – १०० देखि २०० मिमी

अति भारी वर्षा – २०० मिमीभन्दा बढी

सतर्क रहनुपर्ने कारण

मौसमविद्का अनुसार भारी वर्षा हुने क्षेत्रहरूमा सडक अवरोध, नदीमा पानीको बहाव तीव्र, पहिरो र कटानको खतरा रहन्छ। मधेसका तल्लो भूभागमा तात्कालिक डुबानको सम्भावना पनि छ।

• Jigyasanepal