काठमाण्डौ । देशमा फेरि मौसम बद्लिँदै छ। मौसम पूर्वानुमान महाशाखाका अनुसार हाल देशभर पश्चिमी वायु, स्थानीय प्रणाली र बंगालको खाडी तथा अरब सागरबाट आएको जलवाष्पयुक्त हावाको संयुक्त प्रभाव सक्रिय छ। यसको असरस्वरूप देशका विभिन्न भूभागमा मेघगर्जन, चट्याङसहित वर्षा भइरहेको छ।

शुक्रबार साँझ ६ बजे महाशाखाले जारी गरेको बुलेटिनअनुसार अहिलेको समय (शुक्रबार साँझ) बागमती, गण्डकी र लुम्बिनी प्रदेशका थोरै स्थानमा र बाँकी प्रदेशका एक-दुई ठाउँमा हल्कादेखि मध्यम वर्षा भइरहेको छ।

महाशाखाका अनुसार राति कोसी, मधेस, बागमती र गण्डकी प्रदेशका थोरै ठाउँहरूमा र अन्य प्रदेशका पहाडी भूभागका एक-दुई स्थानमा मेघगर्जनसहित वर्षा हुने प्रबल सम्भावना रहेको छ।

यस्तै, कोसी, बागमती र गण्डकी प्रदेशका उच्च पहाडी तथा हिमाली भेगहरूमा हल्का वर्षासँगै हिमपातको सम्भावना पनि महाशाखाले औंल्याएको छ।

यसै सन्दर्भमा महाशाखाले चट्याङ र अचानक वर्षाको सम्भावना रहेको भन्दै सतर्क रहन जनसाधारणलाई आग्रह गरेको छ। पर्वतीय यात्रु तथा हिमाली क्षेत्रमा जान चाहनेहरूलाई आवश्यक सावधानी अपनाउन अनुरोध गरिएको छ।

• Jigyasanepal