काठमाडौँ – काठमाडौँ उपत्यकामा चिसो क्रमशः कम हुँदै गएको संकेत देखिएको छ। आज (बुधबार) बिहान गरिएको सुरुवाती मापनमा काठमाडौँको न्यूनतम तापक्रम ८ डिग्री सेल्सियस पुगेको छ।

मौसम पूर्वानुमान महाशाखाले दिएको जानकारीअनुसार बिहान ५:४५ बजे मापन गर्दा काठमाडौँको न्यूनतम तापक्रम ८.० डिग्री सेल्सियस रेकर्ड गरिएको हो।

यसअघिल्लो दिन अर्थात् मंगलबार यही समयमा काठमाडौँको न्यूनतम तापक्रम ६.१ डिग्री सेल्सियस थियो। यद्यपि मंगलबार बिहान ८:४५ बजे गरिएको आधिकारिक मापनमा न्यूनतम तापक्रम अझ घटेर ५.८ डिग्री सेल्सियस कायम भएको थियो।

आज पनि काठमाडौँको आधिकारिक न्यूनतम तापक्रम बिहान ८:४५ बजे मापन गरिने मौसम महाशाखाले जनाएको छ। उक्त समयमा सुरुवाती मापनको तुलनामा तापक्रम केही घट्न सक्ने सम्भावना रहेको बताइएको छ।

मौसम पूर्वानुमान महाशाखाका अनुसार काठमाडौँसहित देशका विभिन्न स्थानको न्यूनतम र अधिकतम तापक्रम दैनिक रूपमा नियमित मापन गरिँदै आएको छ।

न्यूनतम तापक्रम बिहान ८:४५ बजे

अधिकतम तापक्रम साँझ ५:४५ बजे मापन गरिन्छ।

न्यूनतम तापक्रम दिनभरिमा सबैभन्दा तल झरेको तापक्रमलाई जनाउँछ भने अधिकतम तापक्रम सबैभन्दा माथि पुगेको तापक्रम हो।

हाल काठमाडौँ उपत्यकामा बिहान र बेलुकाको चिसो अझै महसुस भए पनि तापक्रममा क्रमिक सुधार देखिन थालेको मौसमविद्हरूको भनाइ छ।

• Jigyasanepal