काठमाडौं । देशभर मनसुनी वायुको प्रभाव कायम रहेकाले आज पनि विभिन्न प्रदेशका केही स्थानमा भारी वर्षाको सम्भावना रहेको छ। जल तथा मौसम विज्ञान विभागले विशेषगरी वाग्मती, गण्डकी, कोसी र लुम्बिनी प्रदेशका केही क्षेत्रमा भारी वर्षा हुन सक्ने पूर्वानुमान गर्दै आवश्यक सतर्कता अपनाउन आग्रह गरेको छ।

विभागका अनुसार आज दिउँसो देशभर सामान्यदेखि पूर्ण बदली रहनेछ। हिमाली भूभागका केही स्थानमा मेघगर्जन तथा चट्याङसहित मध्यम वर्षा वा हिमपात हुन सक्नेछ। पहाडी भूभागका धेरै स्थानमा तथा कोसी, वाग्मती, गण्डकी र लुम्बिनी प्रदेशका तराईका केही स्थानमा पनि मेघगर्जनसहित वर्षाको सम्भावना रहेको छ।

आज दिउँसो वाग्मती र गण्डकी प्रदेशका पहाडी तथा तराई क्षेत्र, साथै कोसी र लुम्बिनी प्रदेशका पहाडी भूभागका एक–दुई स्थानमा भारी वर्षा हुन सक्ने विभागले जनाएको छ।

रातिको समयमा पनि मौसम बदली रहनेछ। कोसी, वाग्मती र गण्डकी प्रदेशका हिमाली भूभागका केही स्थान तथा लुम्बिनी, कर्णाली र सुदूरपश्चिमका हिमाली क्षेत्रमा मध्यम वर्षा वा हिमपातको सम्भावना रहेको छ। यस्तै, कोसी, वाग्मती, गण्डकी र लुम्बिनी प्रदेशका पहाडी तथा तराईका केही स्थानमा, साथै मधेस प्रदेशका थोरै स्थानमा वर्षा हुने अनुमान गरिएको छ।

विभागका अनुसार कोसी, वाग्मती र गण्डकी प्रदेशका पहाडी तथा तराईका एक–दुई स्थानमा राति पनि भारी वर्षा हुन सक्ने भएकाले नदी–नाला आसपास, पहिरोको जोखिम भएका क्षेत्र तथा डुबान सम्भावित स्थानका बासिन्दालाई उच्च सतर्कता अपनाउन आग्रह गरिएको छ।

मौसमविद् विनोद पोखरेलका अनुसार आगामी तीनदेखि चार दिन वर्षाको तीव्रता केही घट्ने देखिए पनि दैनिक वर्षा जारी रहनेछ। उनका अनुसार तराईका धेरै स्थानमा तुलनात्मक रूपमा कम र पहाडी क्षेत्रमा बढी वर्षा हुने सम्भावना छ।

हाल देशभर मनसुनी वायु सक्रिय रहेको तथा मनसुनको न्यूनचापीय रेखा सरदर स्थानमै रहेको जल तथा मौसम विज्ञान विभागले जनाएको छ।

• Jigyasanepal