काठमाडौं, वैशाख २२ — काभ्रेपलाञ्चोकस्थित बीपी राजमार्गअन्तर्गत खुर्कोट–भकुन्डेबेसी सडकखण्डमा रातिको समयमा सवारीसाधन सञ्चालनमा रोक लगाइएको छ।

जिल्ला प्रशासन कार्यालय काभ्रे ले मंगलबार सूचना जारी गर्दै साँझ ५ बजेदेखि बिहान ५ बजेसम्म उक्त सडकखण्डमा सवारी आवागमन पूर्ण रूपमा बन्द गरिएको जनाएको हो।

प्रशासनका अनुसार वर्षायाम नजिकिँदै जाँदा सडक सुरक्षालाई ध्यानमा राख्दै यस्तो निर्णय गरिएको हो। विशेषगरी रोशी खोलामा आउन सक्ने सम्भावित बाढी, वर्षा र बदलिँदो मौसम अवस्थालाई मध्यनजर गर्दै यो कदम चालिएको जनाइएको छ।

साथै, तोकिएको समयपछि पनि आवश्यकताअनुसार मौसम र जोखिमको अवस्थालाई मूल्याङ्कन गरी जुनसुकै बेला छोटो अवधिका लागि समेत सवारी आवागमनमा थप रोक लगाउन सकिने प्रशासनले स्पष्ट पारेको छ।

यस निर्णयसँगै उक्त सडकखण्ड प्रयोग गर्ने यात्रु तथा सवारी चालकहरूलाई वैकल्पिक मार्ग अपनाउन र सतर्क रहन प्रशासनले आग्रह गरेको छ।

• Jigyasanepal