काठमाडौं, वैशाख ९ – इन्डियन प्रिमियर लिग (आईपीएल) मा शीर्षस्थानमा रहेको गुजरात टाइटन्सले सोमबारको खेलमा कोलकाता नाइट राइडर्सलाई ३९ रनको फराकिलो अन्तरले पराजित गर्दै छैटौं जित दर्ता गरेको छ।
इडेन गार्डेन्स मैदानमा टस हारेर पहिले ब्याटिङ गरेको गुजरातले निर्धारित २० ओभरमा ३ विकेटको क्षतिमा १९८ रनको बलियो योगफल तयार गर्यो। टोलीका लागि शुभमन गिलले आक्रामक ९० रन बनाए भने साइ सुदर्शनले ५२ रनको योगदान दिए। जस बटलर ४१ रनमा अविजित रहे। कोलकाताका आन्द्रे रसेल, वैभव अरोरा र हर्षित रानाले समान १–१ विकेट लिए।
लक्ष्य पछ्याउने क्रममा कोलकाताले निर्धारित ओभरमा ८ विकेट गुमाउँदै १५९ रन मात्र बनाउन सक्यो। कप्तान अजिन्क्या रहाणेले अर्धशतक (५० रन) प्रहार गरे पनि टोलीलाई जितसम्म पुर्याउन सकेनन्। अंगकृश रघुवंशीले अविजित २७ र आन्द्रे रसेलले २१ रन बनाए।
गुजरातका बलरहरु समान रूपमा प्रभावशाली रहे। प्रसिध कृष्णा र राशिद खानले २–२ विकेट लिए, जबकि मोहम्मद सिराज, इशान्त शर्मा, साइ किशोर र वासिङटन सुन्दरले १–१ विकेट झारे।
यस जितसँगै गुजरातले ८ खेलमा १२ अंक जोड्दै शीर्ष स्थान अझै मजबुत बनाएको छ भने, कोलकाताको नाममा मात्र ६ अंक रहेको छ र टोली तालिकाको सातौं स्थानमा सीमित छ।
- H
