काभ्रेपलाञ्चोक । पाँचखाल वडा नम्बर ६ स्थित श्री जोरपाटी माध्यमिक विद्यालयलाई बस हस्तान्तरण गरिएको छ। आइतबार एक कार्यक्रमका बीच बागमती प्रदेशका पूर्व श्रम, रोजगार तथा यातायात मन्त्री लक्ष्मण लम्सालले विद्यालयलाई बस हस्तान्तरण गरेका छन्। कार्यक्रमको अध्यक्षता विद्यालय व्यवस्थापन समितिका अध्यक्ष सरोज धितालले गरेका थिए भने प्रमुख अतिथि पूर्व मन्त्री लक्ष्मण लम्साल थिए।

बस हस्तान्तरण कार्यक्रममा पूर्व श्रम, रोजगार तथा यातायात मन्त्री लम्सालले भने, "प्रदेश सरकारको विद्यालय बस वितरण कार्यक्रम अन्तर्गत बजेट विनियोजन गरेर हामीले बस ल्याउन सफल भयौं। विद्यार्थीको सुविधाका लागि बस किनिएको हुँदा यसको सही सदुपयोग हुनेछ र बस सेवाका कारण विद्यार्थीको संख्या बढ्ने अपेक्षा राखिएको छ।"

मन्त्री लम्सालले विद्यालय राम्रो बनाउन स्थानीय सरकार, जनप्रतिनिधि, शिक्षक, अभिभावक र विद्यार्थी सबैले मिलेर काम गर्नुपर्ने बताए। उनले भने, "विद्यालयको परिवर्तन भनेको समाजको परिवर्तन हो। कुनै ठाउँको समाजको सभ्यता त्यहाँको विद्यालयले देखाउँछ, त्यसैले विद्यालय राम्रो बनाउनु जरुरी छ।"

विद्यालय व्यवस्थापन समितिका अध्यक्ष सरोज धितालले विद्यालय सुधारमा सबैजनाको सहयोग आवश्यक रहेको र आगामी दिनमा विद्यालयलाई नमूना बनाउने बताए। साथै, बस दीर्घकालसम्म चल्ने विश्वास व्यक्त गर्दै अभिभावकलाई निराश नहुन आग्रह गरे।

पाँचखाल नगरपालिकाका उप-मेयर सुर्यमाया दनुवारले बस सञ्चालनमा आउनु खुशीको कुरा भएको भन्दै, यो खुशी निरन्तर रहनका लागि बस राम्रोसँग चल्नुपर्नेमा जोड दिइन्।

बस हस्तान्तरण कार्यक्रममा पाँचखाल नगरपालिका वडा नम्बर ६ का वडा अध्यक्ष रामशरण दुलाल, पाँचखाल नगरपालिका शिक्षा शाखा प्रमुख उदय कोईराला, जोरपाटी माविका प्रधानाध्यापक विष्णु सापकोटा, शिक्षक, विद्यार्थी, र अभिभावकको उपस्थिति रहेको थियो।

• Mr. Admin